Fárið sem grípur um sig vegna brunans í Notre Dame kirkjunni lýsir vel fjölmiðla- og samskiptamiðlaveruleika nútímans.
Það er ekki svo langt síðan, bara fáir áratugir, að maður hefði heyrt um svona atburð í kvöldfréttum, farið svo að sofa og fregnað nánar af honum í morgunfréttum eða á forsíðu Moggans.
Svo hefði atburðurinn verið ræddur á kaffistofum og flestir haldið ró sinni nokkurn veginn.
En á netinu í gær þurftu allir að taka þátt í atburðinum, hafa skoðanir á honum, láta vita af sér í tengslum við hann. Það er auðvitað ágætt að sýna hlutttekningu, en þetta gekk svolítið langt.
Fólk dró fram myndir af sér við kirkjuna og birti í stórum stíl. Margir hafa ferðast til París og eiga myndir af sér með Notre Dame í bakgrunninum. Sjáið, ég var þarna líka, einu sinni! Ég!
Það voru skrifaðar færslur um að bruninn hlyti að vera einhvers konar tímamót eða tákn – um hvað? – já, jafnvel hnignun eða endalok siðmenningar. Við lestur þessa rennur upp fyrir manni hvað margt fólk er í rauninni óstabílt.
Svo fór maður að rekast á samsæriskenningar í kimum alnetsins þar sem því var haldið fram að múslimar hefðu kveikt í kirkjunni. Eða að ekki væri hægt að útiloka það. Fyrr á tímum, þegar þetta guðshús var ekki orðið svo gamalt, hefði orðrómurinn hljómað aðeins öðruvísi, þá hefði verið sagt – gyðingarnir gerðu það!
Það er ákveðið skítverk að reyna að kveða niður falskar fréttir – en slíkt verður samt að gera. Það fer að verða nánast eins og þegnskylda.
Forseti Bandaríkjanna lá heldur ekki á liði sínu, hann tvítaði í miðjum brunanum og sagði að Frakkar væru vitlausir að hella ekki vatni úr flugvélum til að slökkva eldinn.
Þannig vorum við öll með í þessum kirkjubruna. Daginn eftir er maður barasta smá dasaður, því sem betur fer blessaðist þetta sæmilega – slökkviliðsmenn náðu tiltölulega fljótt tökum á eldinum, fyrr en hefði mátt ráða af fréttauppslættinum, kirkjan brann ekki til grunna, helgigripir björguðust, það verður sett fé í að endurreisa bygginguna – sem reyndar var mjög illa farin. Í frétt BBC frá því í byrjun mánaðarins sagði að myndi kosta stjarnfræðilegar upphæðir að gera við Notre Dame. Nú streymir inn fjármagn til að gera við kirkjuna, peningar sem sárlega vantaði í viðgerðir á henni fyrir brunann.
Það dó enginn.
Einn toppurinn er svo reyndar Facebook-færsla fyrrverandi borgarfulltrúa þar sem hann nær að gera samasem merki milli brunans í hinni miklu kirkju og hótelbyggingar við hliðina á Víkurgarði. En það er kannski frekar eitthvað til að hafa gaman að.