Íslandspóstur hefur auglýst starf forstjóra fyrirtækisins laust til umsóknar. Ingimundur Sigurpálsson, forstjóri fyrirtækisins frá árinu 2004, hefur tilkynnt að hann láti af störfum. Fyrirtækið, sem er í eigu ríkisins, glímir við mikla rekstrarerfiðleika vegna samdráttar í bréfapósti. Í september síðastliðnum fékk Íslandspóstur 500 milljóna króna lán frá ríkinu til að styrkja lausafjárstöðu sína.

Í starfsauglýsingunni, sem birt var í Fréttablaðinu, segir:

Forstjóri ber ábyrgð á daglegum rekstri og skipuleggur starfsemina í samráði við stjórn. Hann stuðlar að stöðugum umbótum og gegnir lykilhlutverki í aðlögun póstþjónustu að síbreytilegu rekstrarumhverfi.

Forstjóri kemur fram fyrir hönd félagsins eftir því sem við á, svo sem vegna mála er varða rekstur og stöðu fyrirtækisins og samskipti við Póst- og fjarskiptastofnun, forsvarsmenn erlendra póstfyrirtækja og aðra hagsmunaaðila.

Tímamót eru framundan í rekstri póstþjónustu með gildistöku nýrra póstlaga. Breyttar ytri aðstæður skapa ný tækifæri og leitað er eftir öflugum leiðtoga til að leiða fyrirtækið inn í framtíðina.

Um menntunar og hæfniskröfur segir:

• Víðtæk reynsla af stjórnun og rekstri
• Háskólamenntun sem nýtist í starfi
• Frumkvæði, drifkraftur og metnaður til að ná árangri
• Leiðtogahæfni og færni til að hvetja aðra til árangurs
• Framúrskarandi hæfni í mannlegum samskiptum
• Góð íslenskukunnátta, enskukunnátta og færni til að tjá sig skipulega í ræðu og riti