Innsiglingarvitinn við Sæbraut var reistur í dag, til móts við Höfða. Er honum ætlað að koma í stað vita Sjómannaskóla Íslands við Háteigsveg, en auk vitans er útsýnispallur á staðnum, vegfarendum til yndisauka.
Heildarkostnaður við framkvæmdina var sagður um 150 milljónir króna í desember á vef Reykjavíkurborgar, en upphaflega var gert ráð fyrir að framkvæmdin kostaði 75 milljónir. Endanlegur kostnaður liggur ekki fyrir, en er talinn vera um 175 milljónir króna.
Viðurkenndi Reykjavíkurborg mistök í málinu, hækkunin hafi orsakast af hærra tilboði en áætlun gerði ráð fyrir, auk þess sem umfang við landfyllingu og grjótvarnir og fleira hafi verið vanáætlað.
Faxaflóahafnir greiða 25 milljónir af framkvæmdinni.
Vigdís Hauksdóttir, oddviti Miðflokksins í Reykjavík, hefur gagnrýnt framúrkeyrsluna við framkvæmd vitans. Hún skrifar eftirfarandi á Facebook í dag og birtir mynd af framkvæmdunum:
„Kæru Reykvíkingar og landsmenn allir. Hálfvitinn við Höfða er að rísa. Kostnaðaráætlun 75 milljónir. Endanlegur kostnaður ekki kominn – en stóð í rúmum 175 milljónum þegar ég athugaði síðast …!!!