Eyjan hefur fjallað um pistil Styrmis Gunnarssonar frá því í gær, þar sem hann taldi ekki ólíklegt að ef þingmenn Sjálfstæðisflokksins samþykktu frumvarp um þriðja orkupakkann, misstu þeir traust flokksmanna, sem leiða myndi til fylgistaps í prófkjörum og stofnun sjálfstæðisfélags um fullveldi Íslands á næsta landsfundi.
Össur Skarphéðinsson, fyrrverandi utanríkisráðherra og formaður Samfylkingarinnar, fór mikinn vegna pistils Styrmis og sagði að ekki væri hægt að skilja orð hans öðruvísi en að Styrmir „hóti með sveitum sínum að berjast með virkum hætti gegn sínum gamla flokki í næstu þingkosningum drepi hann ekki þriðja orkupakkann.“
Össur segir þetta útspil Styrmis gagnvart sínum gamla flokki vera „ótrúverðugt“ og gengur svo langt að segja að Styrmir sé hluti af hinu „ógeðslega“ samfélagi sem hann sjálfur hafi lýst, sem og hinu alræmda „djúpríki“. Sagði Össur að Styrmir væri í uppgjöri gagnvart sjálfum sér.
Styrmir segir að um misskilning sé að ræða, að stofnun sjálfstæðisfélags um fullveldi landsins leiði til klofnings:
„Það er misskilningur, sem sjá má á sumum netmiðlum, að hugleiðingar hér á þessum vettvangi um stofnun sérstaks sjálfstæðisfélags um fullveldi Íslands feli í sér hvatningu um klofning Sjálfstæðisflokksins. Því fer víðs fjarri. Sjálfstæðisflokkurinn er stór flokkur og þar er að sjálfsögðu að finna margvísleg sjónarmið og afstöðu til mála. Þannig hefur það alltaf verið. Í skipulagsreglum flokksins er að finna ákvæði, sem gerir mögulegt að stofna sjálfstæðisfélög um einstök málefni en slík félagsstofnun þarf samþykki miðstjórnar og kjördæmisráðs.“
Hann segir allt slíkt tal um klofning vera óskhyggju andstæðinga Sjálfstæðisflokksins:
„Hugmyndir um slíka félagsstofnun komu fram fyrir allmörgum árum, þegar baráttan gegn aðild Íslands að Evrópusambandinu stóð sem hæst. Nú þegar stefnir í að ríkisstjórn með aðild Sjálfstæðisflokksins beiti sér fyrir samþykki orkupakka 3, sem mikil andstaða er gegn innan flokksins er ósköp eðlilegt að slíkar hugmyndir vakni á ný. Hugmyndir andstæðinga flokksins um klofning af þeim sökum eru óskhyggja. Það er hægt að takast á um málefni innan flokka án þess að slík átök leiði til klofnings.“
Þess má geta að ríkisstjórnin samþykkti í morgun að leggja þriðja orkupakkann fyrir Alþingi.
