Katrín Jakobsdóttir forsætisráðherra, fékk afhent minnisblað frá ríkislögmanni um mögulegar afleiðingar dóms Mannréttindadómstóls Evrópu, áður en dómurinn féll þann 12. mars. RÚV greinir frá. Mikið hefur verið rætt í fjölmiðlum um að það skjóti skökku við að dómurinn hafi komið mörgum í ríkisstjórninni svo mikið á óvart líkt og raun bar vitni, til dæmis af viðbrögðum dómsmálaráðherra og fjármálaráðherra í kjölfar dómsins að ráða, en hann virtist koma þeim í opna skjöldu.
Þau viðbrögð verður því að skoða í því ljósi að forsætisráðuneytið og dómsmálaráðuneytið höfðu bæði kallað eftir sérfræðiálitum vegna mögulegrar útkomu dómsins.
Hinsvegar vill forsætisráðuneytið ekki afhenda minnisblaðið til fjölmiðla, en RÚV greinir frá því að forsætisráðuneytið telji að minnisblaðið sé undanþegið upplýsingalögum og neitar að afhenda það, og hefur vísað beiðni RÚV til ríkislögmanns, sem taka þarf ákvörðun um birtingu. Einnig var því hafnað að afhenda minnisblað frá ríkisstjórnarfundinum daginn eftir dóm MDE.
Í upplýsingalögum eru ákveðin gögn undanþegin upplýsingarétti, þar með taldar fundargerðir og gögn ríkisráðs og ríkisstjórnar, sem og bréfaskipti við sérfróða aðila til afnota í dómsmáli:
Gögn undanþegin upplýsingarétti.
Réttur almennings til aðgangs að gögnum tekur ekki til:
1. fundargerða ríkisráðs og ríkisstjórnar, minnisgreina á ráðherrafundum og gagna sem tekin hafa verið saman fyrir slíka fundi,
2. gagna sem útbúin eru af sveitarfélögum, samtökum þeirra eða stofnunum og varða sameiginlegan undirbúning, tillögugerð eða viðræður þessara aðila við ríkið um fjárhagsleg málefni sveitarfélaga,
3. bréfaskipta við sérfróða aðila til afnota í dómsmáli eða við athugun á því hvort slíkt mál skuli höfðað,
4. gagna sem tengjast málefnum starfsmanna, sbr. 7. gr.,
5. vinnugagna, sbr. 8. gr.
Katrín óskaði sjálf eftir minnisblaðinu frá embætti ríkislögmanns, um mögulegar afleiðingar dóms MDE, meðal annars ef dómurinn félli ríkinu ekki í hag. Mun Katrín hafa aflað sér munnlegs álits fjölda sérfræðinga í aðdraganda dómsins, innlendra sem erlendra, til dæmis hjá fulltrúum Dómsmálaráðuneytisins, og norska lögmannsins Thomas Horn, sem komst í kastljós fjölmiðla er hann var norskum fjölmiðlum innan handar þegar Anders Breivik leitaði réttar síns hjá MDE.
Þá var einnig leitað til Davíðs Þórs Björgvinssonar, fyrrverandi dómara við MDE og varaforseta Landsréttar og Hafsteins Dan Kristjánssonar, doktorsnema við Oxford háskóla.
Engin skrifleg minnisblöð gengu ekki á milli ráðuneytanna, samkvæmt svari skrifstofustjóra á skrifstofu yfirstjórnar forsætisráðuneytisins.
Katrín sagði sjálf eftir að dómurinn féll, að honum yrði áfrýjað og var nokkuð afdráttarlaus. Á Alþingi boðaði hún hinsvegar að kallaður yrði til erlendur sérfræðingur til að fara yfir möguleikana í stöðunni.