Vilhjálmur Gíslason var næstum dottinn niður tröppur er hann rakst utan í auglýsingaskilti á Laugaveginum, en varla er þverfótað fyrir þeim á svæðinu. Vilhjálmur, sem er blindur og notast við blindrastaf, greinir frá þessu á mbl.is:
„Það er nánast útilokað fyrir mig að labba Laugaveginn vegna allra hindrana á gangstéttunum. Öll þessi auglýsingaskilti frá veitingastöðum og verslunum eru alls staðar,”
segir Vilhjálmur og nefnir að hann hafi mætt köldu viðmóti hjá Reykjavíkurborg þegar hann vildi gera athugasemdir við þessar hindranir og spyrja hvort einhverjar reglur giltu um slík skilti:
„Ég fékk ekki samband við neinn. Ég fékk alltaf sömu svörin um að ég þyrfti að senda tölvupóst þrátt fyrir að ég benti þeim á að ég gæti hvorki skrifað tölvupóst sjálfur né lesið hann.“
Vilhjálmur hefur einnig talað við veitingahúsaeigendur um skiltin sem segjast skilja vandamálið, en geri ekkert í því. Kallar Vilhjálmur eftir svörum og að ástandið verði bætt:
„Blindir og sjónskertir geta oft verið með læti og það er óþarfi. Ég veit það sjálfur þegar ég var sjáandi að maður hugsaði ekki um það hvernig blindir hafa það. Þegar maður lendir sjálfur í þessu fer maður að skilja,“
segir Vilhjálmur sem segir skilning og þjónustulund skorta hjá Reykjavíkurborg.