Í bókinni Lífið í lit -Helgi Magnússon lítur um öxl, skráð af Jóni Bragasyni, rifjar Helgi upp sögu af Hannesi Hólmsteini Gissurarsyni, háskólaprófessor og frjálshyggjuframmámanni. Í stuttu máli er sagan þannig að Hannes leitaði til Samtaka iðnaðarins, hvar Helgi var formaður, eftir styrk vegna heimildarmyndar um umhverfisvæna atvinnustarfssemi, nefnd Græna hagkerfið. Samtökin höfðu skýra stefnu um að styrkja ekki neitt nema það efldi atvinnulífið í landinu. Fékk Hannes því eina milljón. Á fundi framkvæmdastjórnar Samtaka atvinnulífsins nokkru síðar, komst Helgi að því að Hannes hefði einnig fengið milljón frá Samtökum atvinnulífsins sem og LÍÚ. Þegar upp um þetta komst sagði Friðrik Arngrímsson, þáverandi framkvæmdastjóri LÍÚ:
„Andskotinn, hann kom líka við hjá okkur og náði milljón af LÍÚ með sleipri sölumennsku!“
Að lokum segir Helgi um mynd Hannesar, að engar spurnir hafi hann haft af henni.
Hannes segir söguna ekki sanna í grein í Morgunblaðinu í dag. Hann segist vissulega hafa komið á fund LÍÚ varðandi samstarfsverkefnið Umhverfisvernd, eignaréttindi og auðlindanýting:
„Var erindið, að LÍU aðstoðaði við verkefnið. Friðrik leist vel á, en taldi þurfa atbeina annarra atvinnurekendasamtaka, SI (Samtaka iðnaðarins) og SA (Samtaka atvinnulífsins). Átti ég þá fund um málið með Helga Magnússyni, formanni SI, og Jóni Steindóri Valdimarssyni, framkvæmdastjóra SI. Tóku þeir mér hið besta, og ákvað SI að taka þátt í verkefninu. SA varð einnig aðili að verkefninu, en reiddi af höndum talsvert minna fé, enda var þáverandi framkvæmdastjóri SA, minn góði vinur Vilhjálmur Egilsson, lítt útbær á fé. Er verkefninu rækilega lýst í skriflegum greinargerðum, sem ég sendi til þessara samstarfsaðila. Átti það að felast í ritgerðum mínum, málstofum, ráðstefnum, ekki síst alþjóðlegum, og bók eftir mig um „grænan kapítalisma“. Ég tók fram, að ég myndi reyna að taka upp erindi á ráðstefnum og vinna úr þeim og öðru efni heimildarmynd, en auðvitað að því gefnu, að nægt fé fengist til framleiðslu og slík mynd yrði tekin til sýningar í sjónvarpi. SI lagði fram fé til verkefnisins árin 2010 og 2011. Eins og segir í verklýsingu rann ekkert af þessu fé í minn vasa, heldur var það notað í sérfræðiþjónustu, tölvuvinnslu, ferðakostnað og annað slíkt og þætti ekki mikið.“
Þá höfðar Hannes til hégóma Helga með því að segja að ef sagan væri sönn, hefði snjallasti samningamaður Íslands látið leika á sig:
„Hefur hann þó ósjaldan gortað af því og það jafnvel allsgáður, að hann sé einhver snjallasti samningamaður Íslands fyrr og síðar og gæti ætíð hagsmuna sinna og umbjóðenda sinna út í ystu æsar. Nú stendur hann uppi að eigin sögn sem sannkallaður samningaglópur í viðskiptum við mig, bragðarefinn. Síðan held ég að vísu, að ég verðskuldi ekki að heita styrkjasnillingur, en við hinu vil ég fúslega gangast, að ég er styrkjamaður.“
Hannes segist styrkjamaður þar sem hann hafi lagt sig fram um að styrkja þau verðmæti sem landanum hafi dugað best í harðri lífsbaráttu sinni og minnir á að hann hafi skrifað heila bók til varnar kvótakerfinu:
„Sögnin að styrkja er mín sögn,“ segir Hannes og nefnir að sökum baráttu sinnar fyrir atvinnufrelsi hafi hann gert mörgum kleift að efnast án þess að gróði manna eins og Helga, yrði annarra tap:
„Best kom í ljós í því efnahagslega fárviðri, sem geisaði um allan heim árin 2007-2009 og kom illa niður á Íslendingum, hversu traustar undirstöður höfðu verið lagðar með umbótum í frjálsræðisátt 1991-2004, sem ég átti vonandi einhvern þátt í að móta. Við vorum þeirra vegna fljót að rétta okkur við.“
Í lokin leggur Hannes síðan fram heimildir sem hann segir tengt verkefninu sem hann hlaut styrki fyrir og eru þær alls 17 talsins. Því miður hafi þó ekki fengist nægt fjármagn til gerðar heimildarmyndarinnar, en samtökin öll mættu þó vel við una við árangurinn.
Þá hnýtir hann einnig í söguritarann Björn Jón:
„Hefði skrásetjari Helga, Björn Jón Bragason, að ósekju mátt bera söguna góðu undir mig, en auðvitað hefði þá komið í ljós, að hún var ósönn. Ef menn vilja vera sagnamenn frekar en sagnaritarar, þá hafa þeir vitaskuld það, sem best hljómar, ekki hitt, sem sannara reynist.“
Hannes hafði áður tjáð sig um söguna á Facebook, sem hann kallaði „tilefnislaus brigsl“ og Eyjan fjallaði um. Skammar hann blaðamann Vísis, Jakob Bjarnar, sem notaði orðið „styrkjasnillingur“ til að lýsa Hannesi:
„Mér er hulin ráðgáta, hvers vegna höfundur bókarinnar, Björn Jón Bragason, og blaðamaðurinn, sem hér hamrar á tölvu, Jakob Bjarnar Gretarsson, leituðu ekki til mín, áður en þeir birtu tilefnislaus brigsl Helga Magnússonar. Ég hef margt annað við minn tíma að gera en hlaupa á eftir þvættingi, en ætla samt að svara þessu. Jakob Bjarnar stundar kranablaðamennsku: tekur hrátt upp fullyrðingar í stað þess að sannreyna þær.“
Blaðamaður Vísis, Jakob Bjarnar, svaraaði þessum ávirðingum og benti Hannesi á að hingað til hafi það ekki verið kallað kranablaðamennska að segja frá því sem stendur í bók:
Ég er ekki að fullyrða eitt né neitt sem blaðamaður né taka nokkra afstöðu. Ég er einfaldlega að segja lesendum Vísis af því hvað stendur í téðri bók. Punktur. Það hefur ekki hingað til verið flokkað sem kranablaðamennska. Og reyndar held ég að þú vitir ekki hvað kranablaðamennska er, eins og Jónas skilgreindi hana. Og jafnvel spurning hvort það hugtak sé ekki dautt með netinu.
Ekki fékk þetta Hannes til að skipta um skoðun á vinnubrögðunum og hann svarar:
Þetta svar þitt er fáránlegt, Jakob Bjarnar Gretarsson. Þú endurtekur í fréttinni athugasemdalaust og raunar heldur glaðhlakkalega brigsl þeirra Helga Magnússonar og Björns Jóns Bragasonar. Þú skrúfar frá krana þeirra. Þú stundar þannig kranablaðamennsku. Hvers vegna gastu ekki einu sinni sent mér skeyti á Facebook og spurt mig, hvort eitthvað væri hæft í þessu? Þessi frásögn er fullkominn hugarburður mannsins. Málið er allt öðru vísu vaxið, eins og ég mun gera nánari grein fyrir, þar sem og þegar mér hentar.
Jakob segir þá: „Þú ert fyrstur til að flokka frásögn af því sem fram kemur í bók sem kranablaðamennsku.“
Ritstjóri Kjarnans, Þórður Snær Júlíusson, tekur hart á Hannesi og skýringum hans í dag. Þórður segir:
„Maður sem ítrekað hefur orðið uppvís að því að ljúga upp á aðra, og braut gegn siðareglum HÍ með athæfi sínu, er súr yfir því að sögð sé saga um að hann hafi fengið styrki sem hann sannarlega fékk, vegna þess að þeir fóru í annað en sagan sagði að þeir ættu að fara í. Einmitt.“
Maður sem ítrekað hefur orðið uppvís að því að ljúga upp á aðra, og braut gegn siðareglum HÍ með athæfi sínu, er súr yfir því að sögð sé saga um að hann hafi fengið styrki sem hann sannarlega fékk, vegna þess að þeir fóru í annað en sagan sagði að þeir ættu að fara í. Einmitt. pic.twitter.com/oZbPJHGKFC
— Þórður S. Júlíusson (@thordursnaer) March 21, 2019