Frétt sem birtist á Mbl.is í morgun hljómar eins og leiður misskilngur. Flóttakonu frá Sýrlandi er vísað úr landi af Útlendingastofnun í síðustu viku. Hún hefur dvalið hér í tæpt ár og unnið á Vinagarði sem er leikskóli, rekinn af KFUM og K. Hún var komin með bráðabirgðaatvinnuleyfi. Hefur gefið sér gott orð í leikskólanum, líkt og kemur fram í fréttinni. Aðstoðarleikskólastjórinn, María Sighvatsdóttir, segir að allir hafi grætt á vinnu hennar og hennar sé sárt saknað.
Það er heldur ekki eins og vel gangi að manna störf á leikskólum.
Margrét Jóhannesdóttir hjúkrunarfræðingur sem konan hefur búið hjá, segir að hún sé sérlega djörf, gjafmild og vinnusöm, yndisleg á allan hátt, eins og hún orðar það:
„Hún er dugmikill leiðtogi sem tekst að hrífa fólk með sér til góðra verka, er ósérhlífin baráttukona og okkur öllum mikil fyrirmynd. Hún kunni vel við sig hér, var í vinnu og greiddi sína skatta til samfélagsins. Hverja krónu sem hún vann sér inn sendi hún til fjölskyldu sinnar í Sýrlandi. Öllum, sem hittu hana, fór að þykja vænt um hana. Það var henni mjög erfitt og mikið áfall að vera vísað úr landi. Mikil sorg.“
Það vill svo til að við Margrét erum systkinabörn. Ég veit að hún fer ekki með fleipur.
Í staðinn er konunni sem kölluð er Sophie – það er vegna viðkvæmrar stöðu hennar sem helgast meðal annars af því að hún hefur tekið kristna trú – vísað út á guð og gaddinn. Hún er send til Grikklands þangað sem hún kom eftir flóttann frá Sýrlandi. Útlendingastofnun tekur hina skriffinnskulegu afstöðu – lausa við mannúð – lætur eins og Grikkland sé öruggur staður fyrir flóttafólk.
Ég þekki vel til í Grikklandi – fáum stöðum ann ég heitar. En Grikkland er erfiður og óvæginn staður fyrir flóttafólk. Það helgast af því að Grikkir hafa þurft að taka við gríðarlegum straumi flóttamanna vegna ófriðarástandsins í Miðausturlöndum. Evrópusambandið hefur svikist um að veita þeim almennilegt liðsinni, þannig að þeir hafa setið uppi með vanda sem þeir ráða illa við.
Þetta gerist í miðri kreppu í Grikklandi sem er svo hörmuleg að henni hefur verið líkt við kreppuna miklu sem hófst 1929. Stórlega laskað samfélag á erfitt með að taka við flóttafólki og veita því nauðsynlega vernd og aðbúnað.
Í raun sýnist manni ekkert annað vera í stöðunni en að kalla á Sophiu aftur hingað til Íslands. Því miður er það svo að allir tapa á ákvörðun Útlendingastofnunar.