Ragnar Þór Ingólfsson, formaður VR, var kosinn nýr formaður Landssambands íslenskra verslunarmanna í dag, eftir að Guðbrandur Einarsson ákvað að segja af sér formennsku, vegna ágreinings við forystu VR. Þetta kemur fram í tilkynningu frá LÍV:

„Guðbrandur Einarsson hættir sem formaður LÍV Í kjölfar þess að Landssamband íslenskra verslunarmanna (LÍV) sleit kjarasamningaviðræðum sínum við Samtök atvinnulífsins hjá ríkissáttasemjara, ákvað Guðbrandur Einarsson að segja af sér sem formaður LÍV nú í morgun, miðvikudaginn 20. mars. Stjórn LÍV hittist á fundi í dag og skipti því aftur með sér verkum. Nýr formaður LÍV er Ragnar Þór Ingólfsson, formaður VR, og mun hann sitja í embætti formanns LÍV fram að næsta þingi LÍV sem haldið verður dagana 18. – 19. október 2019. Varaformaður LÍV er Kristín María Björnsdóttir, formaður deildar VR á Austurlandi.“