fbpx
Mánudagur 22.apríl 2019
Eyjan

Ögmundur óttast um VG: „Látið ekki Sjálfstæðisflokkinn eyðileggja kjaraviðræðurnar“

Ritstjórn Eyjunnar
Miðvikudaginn 20. mars 2019 09:15

Ögmundur Jónasson Þingmaður frá 1995 til 2016.

Ekki missa af Helstu tíðindum dagsins í pósthólfið þitt

Lesa nánar

„Mín kynslóð man ömurlegt hlutskipti Alþýðuflokksins sáluga, Framsókn var nær dauða en lífi þegar hún slapp úr hrammi Íhaldsins og nú er ástæða til að óttast um VG,“ segir Ögmundur Jónasson, fyrrverandi þingmaður og ráðherra VG, í grein í Fréttablaðinu í dag. Greinin ber yfirskriftina Látið ekki Sjálfstæðisflokkinn eyðileggja kjaraviðræðurnar.

Þar skrifar Ögmundur meðal annars um skattaútspil ríkisstjórnarinnar sem kynnt var á dögunum, en útspilið var liður í að liðka fyrir kjaraviðræðum. Ögmundur segist lengi hafa haft efasemdir um samstarf félagshyggjuflokka við Sjálfstæðisflokkinn. Segir hann að efasemdirnar snúist um prinsipp og praksis.

Minni aðilinn veslast upp

„Prinsippin eru þau að meini menn eitthvað með pólitískum stefnumarkmiðum sínum, þá kennir reynslan að þau fari forgörðum í slíku samstarfi á milli hægri og vinstri, því hætt er við að annar hvor aðilinn svíki sína umbjóðendur.

Praksisinn er svo einmitt sá að samstarfið veldur því að annar, og yfirleitt minni aðilinn, veslast upp, tærist fyrst að innan og leggur síðan af – í fylgi,“ segir Ögmundur sem rifjar upp áhrif samstarfsins á Alþýðuflokk og Framsóknarflokk. Segir hann ástæðu til að óttast um VG.

Barátta upp á líf og dauða

„Tilefni þessara hugleiðinga nú er skattaútspil ríkisstjórnarinnar á ögurstundu þegar láglaunafólk heyr baráttu nánast upp á líf og dauða.

Lofað hafði verið myndarlegri endurskoðun á skatta- og bótakerfinu sem hefði það í för með sér að hlutur láglauna- og millitekjufólks vænkaðist. Verkalýðshreyfingin tefldi síðan fram tillögum sem hefðu nákvæmlega þetta í för með sér, næðu þær fram að ganga, en vel að merkja, til að koma í veg fyrir tekjutap ríkissjóðs var gert ráð fyrir því að hlutur hátekjufólks vænkaðist ekki og eignafólk greiddi meira en það gerir nú.“

Löðrungur frá Bjarna Ben

Ögmundur lætur svo Sjálfstæðisflokkinn heyra það og segir hann Bjarna Benediktsson fjármálaráðherra nánast hafa löðrungað verkalýðshreyfinguna og samstarfsflokka Sjálfstæðisflokks í ríkisstjórn.

„Sjálfstæðisflokkurinn sem aldrei gleymir því hver hann er, varnarvirki hátekju-Íslands, tekur þetta ekki í mál og fjármálaráðherrann slengir í nafni ríkisstjórnarinnar fram skattatillögum sem eru nánast sem löðrungur á verkalýðshreyfinguna og vel að merkja samstarfsflokkana í ríkisstjórn – hefði maður haldið: Skattalækkun upp á 6.700 krónur, sú sama fyrir marg-milljón króna fólkið og þau sem eiga ekki til hnífs og skeiðar.“

Ögmundur segir að nú þurfi VG og Framsókn og þeir Sjálfstæðismenn sem eiga í sér „félagspólitíska taug“ að rísa upp í sameiningu. Þeir þurfi að krefjast þess að Sjálfstæðisflokkurinn sýni ábyrgð og komi til móts við verkalýðshreyfinguna með myndarlegum jöfnunaraðgerðum í sköttum, vaxtabótum, húsaleigubótum og framgangi til félagslega leigukerfisins hjá sveitarfélögum.

„Það er ekki sæmandi að horfa þegjandi og aðgerðalaus á láglauna- og millitekjufólk heyja þá baráttu sem löngu var tímabær.“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Eyjan
Fyrir 5 dögum

Undirbúningur fyrir stofnun miðhálendisþjóðgarðs í fullum gangi

Undirbúningur fyrir stofnun miðhálendisþjóðgarðs í fullum gangi
Eyjan
Fyrir 5 dögum

„Bullyrðingum“ Sigmars svarað: „Meira og minna allt sem kom fram í máli Sigmars var rangt“

„Bullyrðingum“ Sigmars svarað: „Meira og minna allt sem kom fram í máli Sigmars var rangt“