„Samninganefnd SGS samþykkir að komi ekki nýjar hugmyndir eða viðbrögð frá Samtökum atvinnulífsins á næstu dögum hafi viðræðunefndin fulla heimild til lýsa yfir árangurslausum viðræðum þrátt fyrir milligöngu Ríkissáttasemjara og slíta viðræðum,“ segir í tilkynningu frá Starfsgreinasambandi Íslands.

Undanfarnar þrjár vikur hafa samningaviðræður um nýjan kjarasamning Starfsgreinasambandsins og Samtaka atvinnulífins farið fram undir verkstjórn Ríkissáttasemjara. Forsendur viðræðna hafa verið umræða um nýja launatöflu, styttingu vinnuvikunnar, samræmingu á vinnumarkaði og fleiri atriði.

„Í viðræðum undanfarinna vikna hefur ýmislegt áunnist, annað þokast í rétta átt og sumt er óleyst og því virðist ekki vera lengra komist að sinni. Sú vinna sem hefur verið unnin er þó gagnleg og nýtist vonandi framhaldinu,“

segir í tilkynningunni, en Efling, eitt aðildarfélaga SGS, sleit viðræðum við SA fyrir þremur vikum síðan og hafa boðað til verkfallsaðgerða ásamt VR, náist ekki samningar fyrir næstkomandi mánudag, eða Félagsdómurúrskurði aðgerðirnar ólögmætar. Stefna SA gegn Eflingu verður tekin fyrir klukkan 14 í dag.