Styrmir Gunnarsson, fyrrverandi ritstjóri Morgunblaðsins nefnir fimm dæmi um það sem leysa þurfi í kjaradeilunni til þess að sátt náist í samfélaginu.
„Umræðurnar um stöðuna í kjaramálum hafa skýrt vissa þætti þeirra verulega:
- Sólveig Anna hefur komið því rækilega til skila að láglaunafólk – og þá ekki sízt verkakonur og einstæðar mæður – getur ekki lifað af launum sínum.
- Kröfugerð verkalýðsfélaganna á rætur að rekja til úrskurða Kjararáðs um launahækkanir til æðstu embættismanna, þingmanna, ráðherra og forstjóra og forstöðumanna í opinbera kerfinu. Þar koma líka við sögu launahækkanir æðstu stjórnenda stórfyrirtækja, sem aðallega eru í eigu lífeyrissjóða.
- Lítil og meðalstór fyrirtæki geta ekki tekið á sig þær launakröfur, sem þannig eru til orðnar.
- Lækkun húsnæðiskostnaðar er lykilþáttur í að leysa kjaradeilurnar.
- Gjaldtaka sveitarfélaga á þátt í háum kostnaði við framfærslu. Hvernig stendur t.d. á því að leikskólastigið er eina skólastigið á Íslandi, sem ekki er ókeypis?
Þetta eru verkefnin, sem þarf að leysa til þess að skapa sátt í samfélaginu.“