Miklar umræður hafa verið um pólitíkina í dag í kjölfar þess að Mannréttindadómstóll Evrópu dæmdi skipan Sigríðar Á Andersen dómsmálaráðherra á dómara i Landsdóm ólöglega. Vangaveltur eru um hvaða þingmenn VG munu krefjast afsagnar Sigríðar og/eða greiða atkvæði með vantrausti á dómsmálaráðherrann.
Illugi Jökulsson blaðamaður og samfélagsrýnir skrifar á Facebook:
„Katrín Jakobsdóttir lætur ekki ná í sig. Svandís Svavarsdóttir lætur ekki ná í sig. Aðrir þingmenn Vinstri grænna láta ekki ná í sig. Meðan verið er að plotta í bakherbergjum um hvernig hægt sé að bjarga ráðherrastólum flokksins, þá þarf ekkert að ræða við þjóðina, ónei.“
Gunnar Hrafn Jónsson blaðamaður og fyrrverandi þingmaður Pírata tekur til máls í þræðinum og segir að þetta sé rétta augnablikið til að ljóstra upp um atvik sem átti sér stað milli Pírata og VG-liða fyrir síðustu kosningar:
„Ætli þetta sé ekki mómentið þegar ég segi frá mómentinu þegar allir þingmenn VG í mötuneyti Alþingis stóðu upp frá borðinu þegar Píratar settust þar, og færðu sig yfir á borð Sjálfstæðisflokksins. Það var fyrir síðustu kosningar, eftir að einhver Pírati sagði á Facebook að hann efaðist um orð Svandísar, að ekki stæði til að stofna stjórn með sjöllum.“