Samtök atvinnulífsins hyggjast í dag leggja fram kæru vegna fyrirhugaðra verkfallsaðgerða Eflingar, fyrir Félagsdóm. RÚV greinir frá.

Efling hefur boðað til hefðbundinna verkfalla og truflana á vinnu hjá hreingerningarfólki og þá munu hópferðabílstjórar ekki rukka í strætó í fimm vikur.

„Verkfall snýst um það að mæta ekki í vinnu og þiggja ekki laun. Þarna á að mæta í vinnu, ekki vinna öll störf en samt þiggja laun. Þetta markar skörp og illverjanleg skil frá beitingu og þróun hefðbundins verkfallsréttar. Ef það er eitthvað sérstakt keppikefli að láta reyna á mörk löglegra verkfalla þá munum við takast á við það með því að beina álitamálum til Félagsdóms,“

segir Halldór Benjamín Þorbergsson, framkvæmdastjóri SA og bætir við að enn sé reynt að semja:

„Þau eru að alla daga, líka um helgar að reyna að ná samningum. Við erum í viðræðum við Starfsgreinasambandið, Samflot iðnaðarmanna og Landssamband íslenskra verslunarmanna og það væri óskandi að Efling myndi einnig sitja við samningaborðið í stað þess að vera með kjaradeiluna í þessum átaka farvegi.“