Katrín Jakobsdóttir forsætisráðherra, segist líta Samherjamálið alvarlegum augum og segir að óskað verði frekari skýringa þar sem stjórnsýsla Seðlabankans hafi ekki verið fullnægjandi, líkt og Hæstiréttur hafi komist að. Fréttablaðið greinir frá.

Seðlabankinn hefur verið harðlega gagnrýndur fyrir framferði sitt í Samherjamálinu, í kjölfar ummæla Umboðsmanns Alþingis á fundi stjórnskipunar- og eftirlitsnefndar í síðustu viku, hvar hann greindi frá því að Seðlabankinn hefði beitt Samherja refsiheimildum árið 2016, vitandi vits að bankinn hefði ekki slíkar heimildir, samkvæmt áliti ríkissaksóknara frá 2014.

Skýringar Seðlabankans á framferði sínu eru ekki taldar standast og segir Katrín að kallað verði eftir frekari skýringum, til dæmis um eftirfylgni með umbótum í stjórnsýslu bankans og er varðar samskipti hans við fjölmiðla. Mun Már Guðmundsson, fráfarandi Seðlabankastjóri, mæta á fund stjórnskipunar- og eftirlitsnefndar á fimmtudag, þar sem hann þarf að svara fyrir aðgerðir bankans.