Sanna Magdalena Mörtudóttir, borgarfulltrúi Sósíalista, greiddi atkvæði gegn einni tillögu kjarapakka Sjálfstæðisflokksins á fundi borgarstjórnar í gær, er varðar lækkun útsvars Reykjavíkurborgar, sem er í lögbundnu hámarki.
Sanna segir að lækkun útsvarsins hjálpi ekki þeim verst settu:
„Get ekki séð að flöt skattalækkun á alla, þjóni hagsmunum hinna verr settu. Svo ég segi það enn og aftur, þá þurfum við útsvar frá fjármagnseigendum inn í sameiginlegan sjóð okkar en ekki leiðir sem bjóða upp á það að hinir betur settu greiði minna til samneyslunnar.“
Sanna tekur dæmi um einstakling sem er á lágmarkslaunum, eða 300 þúsund krónur á mánuði. Ef útsvarið yrði lækkað úr 14,52% niður í 14% líkt og Sjálfstæðisflokkurinn leggur til, myndi greiðslubyrði viðkomandi sem dæmið nær til, aðeins lækka um 1500 krónur á mánuði:
„Er ekki séð að slíkt bæti kjör hinna verr settu. Útsvarslækkun gerir það að verkum að sameiginlegur sjóður okkar borgabúa minnkar en sameignlegur sjóður okkar er nýttur til þess að veita þjónustu við borgarbúa. Útsvarslækkun myndi einnig fela í sér að hinir betur settu sem eru með hærri launatekjur, greiði minna til samneyslunnar. Ef eitthvað er þá ætti Reykjavíkurborg að leita til hinna sveitarfélaga með það að markmiði að þrýsta á Alþingi til að leggja útsvar á fjármagnstekjur en þær bera ekkert útsvar líkt og launatekjur,“
segir Sanna og nefnir að þeir fjármunir sem náist með útsvarið í botni eigi að nýtast til að hjálpa þeim verst settu:
„Sé litið til tölfræðilegra upplýsinga síðasta árs, var greiddur fjármagnstekjuskattur 36,9 milljarðar, áætla má að 14,52% útsvar á sama skattstofn gæfi sveitarfélögum 26,8 milljarða króna í tekjur. Af þeirri fjárhæð má áætla að 35% rynni til Reykjavíkurborgar, ef fjármagnseigendur eru hlutfallslega jafn margir í borginni og á landinu öllu. Því má gera ráð fyrir að Reykjavíkurborg hefði geta fengið um 9,5 milljarða í borgarsjóð, þá fjármuni mætti nota til að bæta lífskjör þeirra sem verst standa í borginni.“
Sjá einnig: Segir Dag og meirihlutann ekkert leggja af mörkum í kjaradeilunni:„Það er athyglisvert viðhorf“