Erna Dís Ingólfsdóttir, framkvæmdarstjóri mannauðs- og gæðasviðs hjá Íslandshótelum sagði í samtali við Mbl að svokallaður skammarlisti yfir veikindadaga starfsmanna hafi legið inni á skrifstofu yfirmanns og að frásögn Eflingar hafi verið röng. Efling segir þetta af og frá. Listinn hafi hangið á töflu í almennu rými starfsmanna og birti Efling mynd því til sönnunar.

Erna Dís sagði að Eflingu hafi verið boðið á fund nýlega þar sem rætt var um starfsmannamál. Fundurinn hafi farið vel fram og öll samskipti fagmannleg.

„Þau hefðu líka getað komið hérna og skoðað hjá okkur að þessi listi er ekki uppi á vegg, ef þau hefðu komið. Það er náttúrulega eðlilegt að haldið sé utan um sumarfrí, veikindadaga og annað eins og yfirmenn séu með yfirlit um það hjá sér, í möppum, á sínum einkaskrifstofum.“

„Nú veit ég ekki hvernig þessi mynd komst til Eflingar, alla vega er þessi mynd ekki frá okkur, en ég vil ekki ásaka neinn um neitt heldur.[…] Ég tek það fram að þetta er enginn skammarlisti, þarna er fólk sem er ekki með neina veikindadaga, tvo veikindadaga. Þarna er bara verið að halda utan um það, hvað fólk á mikið af veikindadögum og annað eins.“

Efling hafnar þessum rökum í færslu á Facebook þar sem segir:

„Í morgun sögðum við frá því að á hóteli í Reykjavík hefði verið hengdur listi með upptalningu á hvaða starfsfólk væri oftast veikt – raðað eftir fjölda veikindadaga. Mannauðsstjóri Grand Hótel hefur nú stigið fram og sagt að þessi list hefði legið „inni á skrifstofu yfirmanns“ og hefði ekki hangið „neins staðar uppi“.
Þetta er ekki rétt. Myndin sem við birtum í morgun var tekin í almennu rými fyrir starfsfólk, sem sjá má á meðfylgjandi mynd. Starfsfólk hefur haft samband við Eflingu til að benda á þessar rangfærslur.“

Sjá einnig: 

Skammarlisti yfir veikindadaga starfsmanna: Sólveig – Litið á starfsfólk sem einnota drasl