„Háttalag verkalýðsforystunnar skapar orðsporsáhættu fyrir fjárfesta sem getur gert það að verkum að þeir veigra sér við að fjárfesta í leigufélögunum eða gera það á hærri vöxtum,“ skrifar Ísak Rúnarsson, sérfræðingur hjá Viðskiptaráði Íslands og undrast framgöngu verkalýðsfélaganna gagnvart leigufélögum.
Fyrir stuttu ákvað Almenna leigufélagið, sem GAMMA stýrir, að hækka með litlum fyrirvara húsaleigu á sínu leiguhúsnæði. Ragnar Þór Ingólfsson, formaður VR, brást við með því að gefa Kviku banka fjögurra daga frest til að hætta við áform um kaup bankans á GAMMA, ella verði 4 milljarða fjárfesting VR í bankanum tekin út.
Ísak skrifar grein í tilefni af þessu á Kjarnann þar sem hann lætur í ljós undrun yfir afstöðu verkalýðsfélaganna til leigufélaga:
Því er lítið annað hægt að gera en að klóra sér í höfðinu yfir viðbrögðum og afstöðu verkalýðsforystunnar og annarra sem aðhyllast öflugan leigumarkað til leigufélaganna tveggja. Ekki síst þegar litið er til þess að félögin berjast í bökkum við að tryggja rekstrarlegan grundvöll sinn og ná niður fjármagnskostnaði sem er mjög hár. Bæði þegar litið er til vaxtastigs í samanburði við önnur lönd en einnig í samanburði við önnur kjör hérlendis.
Í lok greinar sinnar vitna Ísak í Laxdælu og skrifar:
„Þeim var ég verst er ég unni mest,“ sagði Guðrún Ósvífursdóttir í Laxdælu. Formaður VR ætti að staldra við og velta fyrir sér hvort þau orð eigi ekki við um hann líka.
