Vigdís Hauksdóttir, borgarfulltrúi Miðflokksins, hefur kært borgarstjórnarkosningarnar í Reykjavík sem fram fóru síðasta sumar. Tilefni kærunnar eru alvarlegar athugasemdir sem Persónuvernd hefur gert við átak borgarinnar í aðdraganda kosninganna til að auka kjörsókn, en borgin sendi kosningahvetjandi skilaboð til ungra kjósenda, innflytjenda með kosningarétt hér á landi og kvenna eldri en 80 ára. Er það mat Persónuverndar að sendingarnar stríði gegn lögum um Persónuvernd.
Vigdís birti fyrir stuttu mynd af kærubréfinu á Facebook og skrifaði:
„Kæran stimpluð og komin inn til Sýslumannsins á höfuðborgarsvæðinu – síðan fer hún til dómsmálaráðuneytisins fái hún ekki ásættanlega meðferð hjá sýslumanni“
Í kærunni segir meðal annars:
„Samkvæmt lögum um kosningar til sveitarstjórnar, nr. 5/1998 er kærufrestur 7 dagar að afliðnum kosningum. Eðli málsins samkvæmt er sá frestur löngu liðinn, en nú hefur Persónuvernd gert alvarlegar athugasemdir við framkvæmd og aðdraganda kosninganna, sbr. úrskurður sem birtur var Reykjavíkurborg 7. febrúar s.l. og lítur kærandi svo á að nýr kærufrestur hafi byrjað að líða þann dag.“