Hagnaður allra þriggja stóru viðskiptabankanna dróst saman árið 2018. Mest hjá Arion banka, sem hagnaðist um 7,8 milljarða, sem er um helmingi minni hagnaður en árið á undan. Þá kemur Íslandsbanki, sem hagnaðist um 10,6 milljarða 2018, en 13,2 milljarða árið 2017. Landsbankinn stóð sig best, hagnaðist um 19,3 milljarða 2018, en 19,8 milljarða 2017. Mbl.is greinir frá.
Höskuldur H. Ólafsson, bankastjóri Arion banka, er launahæstur bankastjóra þriggja stærstu viðskiptabankanna, með 67,5 milljónir á ári, auk bónusa, sem voru 7,2 milljónir. Alls 74,7 milljónir. Arion banki er eini viðskiptabankinn sem ekki er í eigu ríkisins.
Birna Einarsdóttir, bankastjóri Íslandsbanka, þénaði 56,9 milljónir í fyrra í föstum launum og árangurstengdar greiðslur voru 3,9 milljónir. Heildarlaunin voru því 63,5 milljónir.
Birna lagði sjálf fram þá tillögu í fyrra að lækka laun sín um 14,1 prósent „í ljósi stöðunnar í íslensku atvinnulífi og kjaraviðræðna sem nú standa yfir“og við því var orðið. Eru mánaðarlaun hennar því 4,2 milljónir eftir lækkun.
Til samanburðar eru árslaun Lilju Bjarkar Einarsdóttur, Landsbankastjóra, „aðeins“ 44 milljónir, eða 3,8 milljónir á mánuði, en hún hlaut tvær launahækkanir á innan við ári, um samtals 1,75 milljónir á mánuði, sem hafa orðið tilefni mikillar gagnrýni og reiði í samfélaginu.
Samtals fengu bankastjórarnir því greiddar 182,2 milljónir í laun og bónusa í fyrra.
Afkoma bankanna virðist því ekki endurspegla laun stjórnenda þeirra og má velta fyrir sér hvort þau séu nægilegur hvati fyrir stjórnendur bankanna ein og sér, líkt og stundum er haldið fram.
Lilja gæti með góðu móti heimtað aðra launahækkun í ljósi árangurs síns, meðan stjórn Arion banka gæti aftur á móti lagt til launalækkun hjá Höskuldi í ljósi stöðunnar.
Það verður þó að teljast ólíklegt.
Það verður ekki séð að hærri laun skili betri árangri, en hafa verður í huga hina gríðarlegu ábyrgð sem slíkir stjórnendur bera og þá miklu áhættu sem þeir eru í, með að lenda í fangelsi, líkt og Stjórnarmaðurinn komst að orði í viðskiptablaði Fréttablaðsins í gær.
Sjá nánar: Stjórnarmaður segir laun Lilju sanngjörn:Svo miklar líkur á því að enda í fangelsi