Húsnæðisverð hefur verið í hæstu hæðum undanfarin misseri með tilheyrandi vandamálum, ekki síst fyrir fyrstu kaupendur og barnafólk. Þó útlit sé fyrir að verð fari lækkandi á höfuðborgarsvæðinu með auknu framboði og fyrirhuguðu átaki stjórnvalda, Reykjavíkurborgar og verkalýðsfélaganna, má enn sjá stórkostlegt misræmi í verðum þegar farið er út fyrir Reykjavík, enda hefur fasteignamarkaðurinn í nærsveitum Reykjavíkur tekið kipp.

Því til staðfestingar má nefna að samkvæmt færslu Elliða Vignissonar, bæjarstjóra Ölfuss, seldust 15 fyrirhugaðar íbúðir í Þorlákshöfn upp innan sólarhrings frá því tilkynnt var um byggingu þeirra og biðlisti myndaðist um leið.

Davíð Þór Guðlaugsson vekur einnig athygli á þessu á Facebook og bendir á að fyrir rúmar 43 milljónir, sem er ásett söluverð sambærilegrar fasteignar við Lágaleiti í Reykjavík, fái hann næstum þrjár íbúðir í Þorlákshöfn:

„Sturluð staðreynd. Ég get keypt 3 glænýjar blokkaríbúðir í gamla heimabænum mínum (35 mín. fjarlægð frá Reykjavík) á verði einnar íbúðar í Lágaleiti í Reykjavík. Íbúðirnar í Þorlákshöfn og Reykjavík virðast sambærilegar eftir stutta skoðun á netinu, skilast báðar fullbúnar og með öllum tækjum. Þó engin gólfefni á íbúðinni í Lágaleiti. Íbúðin í Þorlákshöfn er skráð 53 fermetrar á meðan íbúðin í Lágaleiti er 47,6 fermetrar en er þó með geymslu í sameign. Ég geri mér fullkomlega grein fyrir því að það er ekki hægt að bera saman fasteignaverð í Reykjavík og Þorlákshöfn en þetta er magnað!“