Bíó Paradís er ótrúlega merkileg og mikilvæg menningarstofnun í borginni. Sýnir kvikmyndir af listrænum toga héðan og þaðan úr heiminum. Það er líka skemmtilegur staður til að koma á og njóta veitinga. Meira að segja poppið er betra þar en í öðrum bíóum.

Bíó Paradís fylgist býsna vel með því sem er að gerast í kvikmyndaheiminum. Eiginlega svo sómi er að.

Tökum dæmi:

Fimm myndir eru tilnefndar til Óskarsverðlauna sem besta erlenda myndin. Tilefningarnar voru kynntar í gær. Þar af eru þrjár í sýningu í Bíó Paradís um þessar mundir. Mexíkóska myndin Roma, japanska myndin Búðaþjófar og pólska myndin Kalt stríð.

Roma fær reyndar heilar tíu tilnefningar, líka sem besta kvikmynd – jafnvel þótt hún sé leikin á spænsku og  líka smávegis á máli frumbyggja í Mexíkó.