„Ég spáði því í október eða nóvember að hér myndi í mars eða svo allt loga í verkföllum og ég stend við það,“ sagði Guðmundur Gunnarsson, fyrrverandi formaður Rafiðnaðarsambands Íslands, í Silfrinu í morgun.

Fréttavefur RÚV greinir frá.

Guðmundur benti á að lægstu laun hefðu vissulega hækkað verulega í síðustu kjarasamningum. Þær hækkanir hefðu verið skammgóður vermir því þær hefðu runnið í ríkissjóð. „Vegna þess að stjórnmálastéttin breytti skattalögunum og bótakerfinu,“ sagði hann.

Hann sagði að þetta væri gömul saga og ný; lægstu laun hefðu hækkað en stjórnmálastéttin ávallt séð sér leik á borði, gripið til aðgerða og eyðilagt þann árangur sem náðst hefði.

Guðmundur sagði að erfiðir tímar væru í vændum. „Við verðum að horfast í augu við það að það eru að koma mikið stærri, stórir og fjölmennir hópar sem eru að koma inn í karphúsið á næstu vikum.“

Þá sagði hann að stjórnmálastéttin ætti í raun að bakka aftur til ársins 2013 með þær breytingar sem hafi verið gerðar á kerfum síðan þá. Þannig mætti bæta kjör þeirra lægst launuðu. Loks sagði hann að þetta ætti eftir að verða eitt helsta deiluefnið í komandi kjaraviðræðum.