„Nú hef ég sannreynt að í inngangi að umræddum 6 ára gömlum Kastljóssþætti er skýrt tekið fram, að títtnefnt viðtal við greinarhöfund var tekið áður en kunnugt var um að rannsókn væri hafin á nafngreindu fyrirtæki.“

Þetta segir Páll Magnússon, fyrrverandi útvarpsstjóri og þingmaður Sjálfstæðisflokksins, á Facebook-síðu sinni. Tilefnið er frétt sem birtist í Morgunblaðinu í gær – og Eyjan fjallaði meðal annars um – þar sem rætt var við Pál um mál Elínar Bjargar Ragnarsdóttur, fyrrverandi framkvæmdastjóra Samtaka fiskframleiðenda, sem sendi forsvarsmönnum RÚV tölvupóst eftir viðtal sem birtist við hana í Kastljósi árið 2012.

Í grein sem Elín Björg skrifaði í Morgunblaðið í vikunni sagði hún að Helgi Seljan á RÚV hefði tekið við sig viðtal á fölskum forsendum. Hún hafi í janúar 2012 rætt við hann um sam­keppn­is­lega mis­mun­un í inn­lendri fisk­vinnslu og nauðsyn aðskilnaðar veiða og vinnslu.

„Þegar leið á viðtalið fjallaði ég einnig lít­il­lega um mögu­leika fyr­ir­tækja sem hefðu alla virðiskeðjuna á eig­in hendi til að taka arð af auðlind­inni út í er­lendu fyr­ir­tæki. Tók ég skýrt fram að slíkt fyr­ir­komu­lag væri lög­legt og ef menn vildu breyta þess­um leik­regl­um yrði að breyta lög­gjöf­inni. Ég gagn­rýndi því lög­gjöf­ina en ekki eitt ein­asta fyr­ir­tæki sem nýtti sér þessa glufu, þrátt fyr­ir að Helgi Selj­an hefði ít­rekað reynt að fá mig til að nefna eitt eða fleiri af stóru út­gerðarfyr­ir­tækj­un­um,“ segir Elín.

Síðan hafi viðtalið ekki birst og hún haldið að því hafi verið slaufað. Síðan í lok mars hafi hún séð sjálfa sig tala um möguleika fyrirtækja til að taka út arð í er­lendu fyr­ir­tæki í tengslum við húsleit Seðlabankans, Tollstjóra og Sérstaks saksóknara á skrifstofum Samherja. Kvaðst Elín hafa sent útvarpsstjóra, Kastljósi og fréttastofu RÚV tölvupóst þar sem hún lýsti óánægju sinni en ekki fengið nein svör.

Í Morgunblaðinu í gær sagðist Páll ekki muna eftir tölvupóstinum en sagði þó ljóst að um alvarlegt mál væri að ræða ef rétt reyndist. „Ef lýsing Elínar Bjargar sem fram kemur í þessari blaðagrein er rétt, að klippt hafi verið saman viðtöl um allt annað efni en var til umfjöllunar, þá er um hreina fréttafölsun að ræða,“ sagði Páll í viðtalinu.

Páll dró svo í land í gærkvöldi eftir að hafa kynnt sér málavexti betur.

„Í þessari frétt í Mogga dagsins segi ég að atvikalýsing í tiltekinni blaðgrein fæli í sér fréttafölsun ef rétt væri. Ég slæ líka þann fyrirvara að ég hefði ekki séð andsvör þeirra sem um er fjallað. Nú hef ég sannreynt að í inngangi að umræddum 6 ára gömlum Kastljóssþætti er skýrt tekið fram, að títtnefnt viðtal við greinarhöfund var tekið áður en kunnugt var um að rannsókn væri hafin á nafngreindu fyrirtæki. Því verður því ekki haldið fram með réttu að viðtalið hafi verið tekið og birt á fölskum forsendum. Rétt skal vera rétt,“ segir Páll.