„Hugsanlegt tilefni er auðvitað fyrirferð Ríkisútvarpsins almennt á þessum markaði. Það barst nú talsvert af kvörtunum yfir því hvernig Ríkisútvarpið gekk fram í auglýsingamálum í tengslum við HM í fótbolta. Svo hefur, af einhverjum ástæðum, stofnunin móast við að framfylgja þeim laga áskilnaði að aðskilja beri samkeppnisrekstur stofnunarinnar og almannaþjónustu,“

segir Páll Magnússon, þingmaður Sjálfstæðisflokksins og fyrrverandi útvarpsstjóri við Fréttablaðið, um af hverju Ríkisendurskoðun hyggst ráðast í stjórnsýsluúttekt á Ríkisútvarpinu. Úttektin mun taka til reikningsskila og samkeppnisreksturs RÚV og er sú fyrsta sem gerð er á stofnuninni í 24 ár, en úttektin er gerð að frumkvæði Ríkisendurskoðunar, sem hefur ekki viljað upplýsa um tilefnið til þessa.

„Það er líka á það að líta að þetta kemur á sama tíma eða rétt áður en mennta- og menningarmálaráðherra leggur fram boðað frumvarp um að bæta stöðu einkarekinna fjölmiðla á markaði. Og í því frumvarpi hlýtur að vera gert ráð fyrir því að það verði með einhverjum hætti minnkuð fyrirferð Ríkisútvarpsins. Sérstaklega sem snýr að auglýsingamarkaði,“

sagði Páll.