Ragnar Þór Ingólfsson, formaður VR, vill gera „gagngerar breytingar“ á lífeyrissjóðakerfinu. Hann segir kerfið of dýrt fyrir fyrirtæki sem haldi niðri launum. Hann segir verkalýðsfélögin tilbúin til þess að skoða lægri iðgjöld gegn því að laun verði hækkuð í kjarasamningum. Morgunblaðið greinir frá.
„Sé litið á ávöxtunarkröfuna á hagkerfið út frá innlendum eignum lífeyrissjóðanna eru þær á fimmta þúsund milljarðar og hærri en landsframleiðslan. Lífeyrissjóðirnir taka því bróðurpartinn af hagvextinum til sín í kröfu á ávöxtun sjóðakerfisins. Það er meðal annars gert með því að halda uppi vaxtakostnaði almennings af húsnæðislánum og með því að halda uppi álagningu í smásölufyrirtækjum sem lífeyrissjóðirnir eiga. Þetta gerist líka með því að lækka kaupgjaldið,“
segir Ragnar Þór og minnir á að mótframlag atvinnurekenda hafi hækkað um 3,5 prósent síðustu árin í 11,5 prósent. Iðgjald launamanns er nú 4 prósent og framlagið í lífeyrissjóð er því alls 15,5 prósent.
Ragnar segir að með þessari hækkun eigi lífeyrisréttindi að vera komin í 72-76 prósent af meðallaunum ef miðað sé við 40 ára inngreiðslutíma, en hlutfallið var 56 prósent:
„Hins vegar verður þessi breyting ekki komin fram að fullu fyrr en eftir 40 ár. Eftir þessa hækkun getur iðgjald til söfnunar lífeyrisréttinda orðið allt að 21,5%, að teknu tilliti til framlags í séreignarsjóði, sem getur verið allt að 6%, eða 2-4% frá launþegum og 2% frá atvinnurekendum,“
segir Ragnar og að slík viðbót gefi um 18,6-28 prósent réttindi ef reiknað er á sama grunni og gert sé með samtryggingarkerfi lífeyrissjóðanna.