Daníel Örn Arnarsson, varaborgarfulltrúi Sósíalistaflokks Íslands, sendi í síðustu viku eintak af braggaskýrslunni til héraðssaksóknara, ásamt erindi um að skoða málið. Þessu greinir hann frá á Facebooksíðu sinni í dag.
„Til þess að skera á skrípaleikinn í borgarstjórn Reykjavíkur ákvað ég að senda héraðssaksóknara erindi þar sem ég sendi honum skýrslu innri endurskoðunar um braggann. Kannski getur borgarstjórn frekar rætt öll hin aðkallandi verkefni sem bíða eins og td tillögu sósíalista um að verða við kröfum verkalýðshreyfingarinnar.“
Í viðtali við Fréttablaðið segir Daníel að honum hugnist ekki tímasóun Vigdísar Hauksdóttur, Miðflokki og Kolbrúnar Baldursdóttur, Flokki fólksins, sem boðuðu að þær hygðust leggja fram tillögu um að borgarstjórn sendi héraðssaksóknara skýrsluna. Segir Daníel hugmynd þeirra kjánalega:
„Ef þær vilja senda þetta til héraðssaksóknara þá hefðu þær bara átt að gera það sjálfar en ekki vera að sóa tíma borgarstjórnar þar sem verið að taka á mjög mikilvægum hlutum.“
Þær stöllur breyttu tillögu sinni lítillega í dag, þar sem embætti borgarlögmanns var falið að vísa málinu til þar til bærra yfirvalda og vildu með því víkka og skýra vísunina.
„Ég er búinn að gera þetta fyrir þær þannig að við getum sleppt því að spjalla um þetta og farið að ræða hvernig við ætlum að breyta kerfinu sem hefur brugðist þarna. Frekar en að tala um hverjum þetta er að kenna. Það skilar engu. Við getum talað um hvað á að gera í kjölfarið. Hverju á að breyta og hverju framkvæmdastjórinn á að breyta. En ekki vera að reyna að taka okkur dómsvaldið í hendur. Þar erum við með kerfi sem virka ágætlega,“
segir Daníel við Fréttablaðið.