Boðað hefur verið til opins fundar í stjórnskipunar- og eftirlitsnefnd Alþingis á morgun, um skipan sendiherra. Verður fundurinn í beinni útsendingu. Bjarni Benediktsson fjármálaráðherra og Guðlaugur Þór Þórðarson utanríkisráðherra hafa boðað komu sína, en fjallað verður um þær upplýsingar sem fram komu í Klaustursupptökum Báru Halldórsdóttur, þar sem skipan sendiherra var rædd.
Þeir Sigmundur Davíð Gunnlaugsson, formaður Miðflokksins og Gunnar Bragi Sveinsson, þingflokksformaður, hafa ekki enn staðfest komu sína, en þeir voru einnig boðaðir á fundinn. Það staðfestir Helga Vala Helgadóttir, formaður nefndarinnar, við Fréttablaðið.
Þeir Miðflokksmenn staðfestu ekki heldur komu sína þegar fyrst var boðað til fundarins fyrir jól, en þá átti Guðlaugur Þór heldur ekki heimangengt þar sem hann var erlendis.
Eyjan greindi frá því að á Klaustursupptökunum heyrðist Gunnar Bragi tala um með hvaða hætti hann skipaði þá Árna Þór Sigurðsson og Geir H. Haarde sendiherra. Var skipan Árna til þess að beina athyglinni frá skipan Geirs og virtist Gunnar Bragi líta svo á að hann ætti greiða inni hjá Sjálfstæðisflokknum vegna skipunar Geirs, þar sem það þótti mikið hitamál vegna Landsdómsmálsins. Hafa allir hlutaðeigandi neitað fyrir þessa fléttu, þar á meðal Katrín Jakobsdóttir forsætisráðherra, en Gunnar segir á upptökunum að hann hafi tryggt þögn Katrínar vegna skipan Geirs. Ekki kemur fram með hvaða hætti sú trygging fór fram, en Gunnar Bragi sagði daginn eftir að fréttin birtist um málið, að hann væri enn vongóður um að hljóta sendiherrastöðu, hann teldi sig geta orðið góðan sendiherra.
Síðar tók Guðlaugur Þór Þórðarson skýrt fram, að Gunnar Bragi yrði ekki sendiherra.