Það er alveg rétt sem Theresa May sagði eftir að Brexit-samningur hennar var felldur með yfirgnæfandi meirihluta í breska þinginu:
Þingmennirnir vita hvað þeir vilja ekki, en þeir vita ekki hvað þeir vilja.
Hún hittir algjörlega naglann á höfuðið. Það sama virðist reyndar eiga við um þjóðina líka.
En þarna er líka skýringin á því hvers vegna er nánast ómögulegt að finna einhverja lausn á málinu. Í atkvæðagreiðslunni í kvöld greiddu bæði hörðustu andstæðingar Evrópusambandsins og þeir sem vilja fyrir alla muni að Bretland verði áfram í ESB atkvæði á móti.
May getur farið aftur til Brussel og beðið um betri samning, kannski fær hún einhverja eftirgjöf, varla þó mikla, en það er nákvæmlega engin trygging fyrir því að málið fari öðruvísi. Jafn líklegt er að næsta útgáfa af samningi yrði líka felld og svo koll af kolli. May virkaði uppgefin í þinginu í kvöld.
Málið er í hörðum hnút. Jeremy Corbyn boðar vantrauststillögu á May sem verður tekin fyrir í þinginu á morgun. Að líkindum verður hún felld. Íhaldsflokkurinn vill ekki fara í kosningar þótt stór hluti hans hafi gert uppreisn gegn forsætisráðherranum.
Reyndar er vandséð væru einhvers konar lausn. Corbyn hefur verið jafn tvístígandi gagnvart Brexit og þingheimur. Í hjarta sínu er hann hallur undir Brexit. Er líklegt að hann geti skilað betri samningi og fengið hann samþykktan?
Besta ráðið núna virðist vera að fá sem lengstan frest á útgöngunni – en það er líklega ekki í boði.