Vala Pálsdóttir, formaður Landssambands sjálfstæðiskvenna, líkir Jóni Baldvin Hannibalssyni, fyrrverandi utanríkisráðherra, við Jimmy Savile, einn alræmdasta barnaníðing Bretlands, í færslu sinni á Facebook.
Tilefnið eru #metoo sögurnar af Jóni sem sprottið hafa fram á undanförnum dögum, þar sem hann er sagður hafa kynferðislega áreitt stúlkur og konur allt frá árinu 1967. Sögurnar eru birtar undir nafninu #metoo Jón Baldvin Hannibalsson í lokuðum hópi á Facebook.
Vala er systurdóttir Bryndísar Schram, eiginkonu Jóns Baldvins, en segist í færslunni ávallt hafa trúað frásögnum Aldísar, dóttur Jóns Baldvins, og Guðrúnu Harðardóttur, en Guðrún steig fram með reynslusögu sína af Jóni Baldvin árið 2012, er ósæmileg bréf hans til Guðrúnar sem barnungar stúlku voru birt.
Vala segist segist bera mikla virðingu fyrir þeim konum sem nú stíga fram og líkir Jóni Baldvin við Jimmy Saville, sem sakaður var um brot gegn 589 fórnarlömbum, allt niður í átta ára börn, á um 50 ára tímabili. Fóru sum brotin fram innan veggja BBC hvar Savile var lengi með sjónvarpsþætti, en í kjölfar máls hans fór fram mikil umræða um af hverju enginn hefði sagt neitt, þegar augljóst var að eitthvað misjafnt gekk á.
Vala segir:
„Ég hef alltaf trúað Guðrúnu og Aldísi og hef ekki þurft frekari vitni til. Eins og móðir mín segir, þá höfum við ekkert haft af þeim Bryndísi og Jóni að segja frá því að Guðrún sagði okkur fyrst frá máli sínu. Saga Aldísar er þyngri en tárum taki. Er ekki kominn tími til að binda enda á því að spyrja Jón álits á þjóðfélagsmálum? Ég vona að allir geti myndað sér sjálfstæða skoðun þó ekki væri nema á því að lesa bréfin sem hann skrifaði barnungri stúlku sem tengist honum fjölskylduböndum. Mér stendur slétt sama um hvað þessi fyrrverandi stjórnmálamaður hefur að segja eða breytir um skoðun til þess eins að koma sér að í fjölmiðlum. Við þurfum ekkert að lengja líf hins íslenska Savile í fjölmiðlum frekar!
