Stjórn ADHD-samtakanna hefur sent frá sér ályktun þar sem „síendurteknum villandi“ málflutningi landlæknis er hafnað og krafist þess að hann dragi til baka dylgjur starfsmanna embættisins um meintar ofgreiningar. „Málflutningur starfsmanna embættisins byggir ekki á vísindalegum forsendum eða er í besta falli mistúlkun á fyrirliggjandi gögnum.“
Í ályktuninni segir stjórn samtakanna málflutning landlæknis fela í sér „alvarlega aðdróttun um að íslenskir geðlæknar og sálfræðingar hafi um árabil stundað kerfisbundið fúsk við greiningar á ADHD og læknisfræðilegar ráðleggingar þeim tengdum“.
Samtökin segja málflutning landlæknis til þess eins fallinn að ala á fordómum í garð einstaklinga með ADHD og þeirra fáu úrræða sem aðgengileg eru og best hafa nýst hér á landi.
Starfsmenn embættis landlæknis hafa ítrekað látið í ljós þá skoðun landlæknis að greiningu ADHD og tilheyrandi lyfjagjöf sé ábótavant á Íslandi. Segir meðal annars í 24. pistli embættis landlæknis, sem birtist í Læknablaðinu á síðasta ári: „Á Íslandi er brotakennt heilbrigðiskerfi sem lýsir sér meðal annars í því að sjúklingar fá ekki alltaf þá þjónustu sem þeir þurfa. Í slíku kerfi er tilhneiging að „leysa“ vandamálin á einfaldan og fljótlegan hátt með lyfjum í stað þess að takast á við vandann á annan hátt sem oftast er vænlegra til langtímaárangurs. Ofgreiningar og sjúkdómavæðing er sennilega hluti vandans. Hér má benda á að ofvirkni með athyglisbresti (ADHD) er ein örfárra sjúkdómsgreininga sem fólk sækist eftir að fá.“
Krefjast samtökin að Embætti landlæknis dragi til baka „dylgjur starfsmanna embættisins um meintar ofgreiningar fagfólks og ofnotkun lyfja vegna ADHD, enda slíkur málflutningur til þess eins fallinn að ala á fordómum í garð einstaklinga með ADHD og þeirra fáu úrræða sem aðgengileg eru og best hafa nýst hér á landi.“