Bjarni Benediktsson, fjármálaráðherra, skrifaði fróðlegt tíst á Twitter á laugardaginn, sama dag og Morgunblaðið greindi frá því að WOW air skuldaði Isavia um tvo milljarða í lendingargjöld.
„Fróðlegur gamall leiðari í samhengi málefna dagsins. En ég er farinn á völlinn,“
skrifar Bjarni og birtir hlekk á gamlan leiðara Morgunblaðsins frá 1980, þar sem fjallað er um erfiða stöðu Flugleiða.
Fróðlegur gamall leiðari í samhengi málefna dagsins.
En ég er farinn á völlinn.https://t.co/ceF87UwdGB— Bjarni Benediktsson (@Bjarni_Ben) September 15, 2018
Í leiðaranum kemur fram að á fyrstu sex mánuðum ársins 1980 var fjöldi viðkomufarþega á Keflavíkurflugvelli 100.000 manns, helmingi færri en árið áður. Stórhækkun á eldsneytiskostnaði, undirboð í verðstríði á fjölþjóðaflugleiðum ásamt verkefna- og tekjuhruni Flugleiða var sögð skýringin ásamt innlendri verðbólgu og skammsýni stjórnvalda, sem fólst í því að lækka ekki, eða afnema, lendingargjöld Flugleiða, líkt og gert hafði verið fyrir Loftleiði árin 1979 og 1980. Voru lendingargjöldin og flugvallargjöldin, eldsneytisverð og flugvallarskattur sagður helsti dragbíturinn á erlend flugfélög að hafa hér viðkomu.
Skúli Mogensen svaraði grein Morgunblaðsins í færslu á Facebook, þar sem hann neitaði því að hafa nokkurn tíma skuldað Isavia yfir tvo milljarða. Bauð sú skýring upp á aðra túlkun, að WOW gæti hafa skuldað Isavia aðeins minni upphæð, en WOW vildi ekki svara Morgunblaðinu hvort félagið skuldaði einhver lendingargjöld og hvort sú skuld væri gjaldfallin.
Þrátt fyrir fordæmingu Skúla Mogensen á vinnubrögðum Morgunblaðsins, stóð blaðið við fréttina og blaðamaðurinn Stefán Einar Stefánsson, fréttastjóri Viðskipta hjá Morgunblaðinu, kallaði eftir svörum Skúla í athugasemdarkerfi Facebooksíðu hans, án þess að fá svör.
Á morgun klukkan 14 mun WOW gefa út tilkynningu um niðurstöðu skuldabréfaútboðsins.
Hvort tíst Bjarna sé vísbending um mögulega aðkomu stjórnvalda að skuldastöðu WOW skal hinsvegar ósagt látið, en þess má geta að fjármálaráðherra fer með eina hlutabréfið í Isavia ohf og tilnefnir alla fimm stjórnarmenn þess.