Samkvæmt lista The Sunday Times voru eignir Bakkavararbræðranna Ágústar og Lýðs Guðmundssona, metnar á 700 milljónir punda, eða rúmlega 100 milljarða íslenskra króna um síðustu áramót. Kjarninn greinir frá.
Bræðurnir eru metnir sem 197. ríkustu íbúar Bretlands á listanum, en árið 2016 sátu þeir í 885. sæti. Stökkva þeir því upp um 688 sæti á einu ári, en eignir bræðranna jukust um 80 milljarða íslenskra króna milli ára.
Til gamans má geta að efstur á listanum er Íslandsvinurinn James Ratcliffe, jarðeigandi.
Bakkavör er í umfjöllun The Sunday Times sagður einn af stærstu örbylgjumáltíðaframleiðendum Bretlands sem selji til helstu verslana landsins.
Bræðurnir Ágúst og Lýður stofnuðu fyrirtækið árið 1986 og í gegnum fjárfestingafélagið Exista voru þeir meðal umsvifamestu viðskiptamönnum Íslands fyrir hrun, sem stærstu eigendur Kaupþings, VÍS, Lýsingar, Viðskiptablaðsins og Símans.
Eftir erfiðleika í hruninu misstu þeir Bakkavör frá sér, en náðu þó yfirráðum á ný árið 2016 með samkomulagi við bandaríska vogunarsjóðinn Baupost Group.
Bakkavör var skráð á markað í fyrra og eiga bræðurnir 50,15% hlut í fyrirtækinu og Baupost tæplega 25 prósent. Skráningargengið var 1,8 pund á hlut, en er nú 1,72 pund á hlut.
Ágúst er forstjóri, en Lýður er í stjórn, hætti sem stjórnarformaður í fyrra.
