Lífsgæði í hverfinu þar sem ég bý, neðst í Þingholtunum, hafa batnað talsvert síðustu árin sökum þess að auðveldara er með aðföng. Opnað hafa matvöruverslanir sem eru allar í góðu göngufæri. En nú virðist það ætla að breytast.

Víðir sem var með litla búð í Ingólfsstræti fór á hausinn og lokaði í vor. Ég frétti í gær að Kjöt & fiskur sem hefur verið í Bergstaðastræti sé að loka í síðasta sinn. Og svo er það Bónus.

Bónus hefur verið með búð á Hallvegarstíg, frekar litla á mælikvarða Bónuss, en býsna þægilega. Þangað fara íbúar hverfisins, en líka skólakrakkar úr nágrenninu (þarna eru bæði MR og Kvennó) og svo mikill straumur af ferðamönnum.

Nú hefur Samkeppniseftirlitið heimilað samruna Haga og Olís en þó með því fororði að Bónus losi sig við nokkrar búðir. Meðal þeirra sem fær að fjúka er verslunin á Hallveigarstíg. (Í gærmorgun var biðröð fyrir utan hana þegar hún opnaði.)

Ástandið í verslun í hverfinu hefur semsagt hríðversnað á stuttum tíma. Nú eru næstu búðir 10/11 í Austurstræti – en þangað fer maður varla til að kaupa í matinn – og Krambúðin efst á Skólavörðustíg – þar er fyrst og fremst túristabúð. Jú, og svo pínulítil búð, alveg ágæt, Bláhornið á Grundarstíg.

En þetta eru semsagt ekki góðar fréttir fyrir hverfið. Maður spyr hverju Samkeppniseftirlitið ætlar að ná fram með þessari niðurstöðu. Hún minnir dálítið á þegar Forlagið fékk að verða til á sínum tíma, úr samruna bókaútgáfa. Þá var kvöð um að sem setti takmarkanir á hvað Forlagið mátti gefa út af Halldóri Laxness.

Afleiðing þessa var fyrst og fremst minni útgáfa á bókum eftir Laxness. Sem mörgum þykir væntanlega synd.