Samkeppniseftirlitið, áður Samkeppnisráð, hefur lagt á stjórnvaldssektir fyrir 8,677 milljarða króna í 81 máli frá árinu 2001 til júní 2018. Þetta kemur fram í svari Samkeppniseftirlitsins við fyrirspurn Eyjunnar.
Samkeppniseftirlitið var stofnað árið 2005 þegar ný samkeppnislög tóku gildi. Að sama skapi voru Samkeppnisstofnun og Samkeppnisráð lögð niður. Eftirlit með óréttmætum viðskiptaháttum og gagnsæi markaðar fluttist til Neytendastofu, en hlutverk Samkeppniseftirlitsins er að „vinna gegn óhæfilegum hindrunum og takmörkunum á frelsi í atvinnurekstri, vinna gegn skaðlegri fákeppni og samkeppnishömlum og auðvelda aðgang nýrra keppinauta að markaðnum,“ samkvæmt heimasíðu.
Í yfirliti stjórnvaldssekta í samkeppnismálum sést að hæsta sektin nam 560 milljónum, árið 2004 í máli Olís hf. fyrir ólöglegt samráð.
Næst hæsta sektin nemur 500 milljónum, árið 2013, vegna alvarlegra brota Valitors hf. á samkeppnislögum.
Þá er þriðja hæsta sektin 495 milljónir, vegna Olíufélagsins (Kers hf.) vegna ólöglegs samráðs árið 2004.
Næst koma þrjár sektir upp á 450 milljónir, annarsvegar í máli Arion banka árið 2015 og hinsvegar Landsbankans, einnig árið 2015, en þriðja fyrirtækið er Skeljungur hf. vegna ólöglegs samráðs árið 2004.
Allar upphæðir miðast við þann tíma sem þær voru lagðar á.
Í yfirlitinu má einnig sjá afdrif allra mála Samkeppniseftirlitsins fyrir áfrýjunarnefndum og dómstólum.
Í alls 28 máli af 81, hafa endanlegar sektir lækkað frá ákvörðun Samkeppniseftirlitsins til málaloka, en í öllum tilfellum voru ákvarðanir Samkeppniseftirlitsins kærðar, nema einu, þegar mál Securitas hf. um meinta misnotkum á markaðsráðandi stöðu frá 2014 var dregið til baka.
Það fyrirtæki sem oftast hefur verið sektað er Síminn hf. eða alls fimm sinnum, fyrir samanlagt 565 milljónir, milli áranna 2001 og 2012.
Yfirlitið má nálgast hér að neðan:
