Skiptum er lokið í félagi Ármanns Þorvaldssonar, forstjóra Kviku banka hf., sem ber heitið Ármann Þorvaldsson ehf. Lýstar kröfur voru rúmir 5,7 milljarðar króna en alls fengust 152.574.720 krónur upp í lýstar kröfur. Þetta kemur fram í Lögbirtingablaðinu í dag. Félagið var úrskurðað gjaldþrota árið 2011 og því hafa skiptin tekið rúm sjö ár.
Ármann var einn af þeim lykilstarfsmönnum Kaupþings sem fékk há lán til þess að kaupa hlutabréf í bankanum. Ármann færði síðan hlutabréf sín og lán yfir í áðurnefnt félag í byrjun árs 2007 sem kom í veg fyrir að hann yrði persónulega gjaldþrota í kjölfar bankahrunsins.
Árið 2011, sama ár og félagið var úrskurðað gjaldþrota, greindi DV frá því að Ármann hefði gert kaupmála við eiginkonu sína en þá var glæsihýsi þeirra við Dyngjuveg meðal annars skráð á hana. Í stuttu viðtali við blaðið á þeim tíma sagði Ármann: „Ég er ekki að flýja neinar skuldir eða eitthvað svoleiðis. Er ekki að fara frá neinum persónulegum skuldum. Ég held ég tjái mig þó ekki að öðru leyti um þetta,“ sagði Ármann. Eignarhald hans á einkahlutafélaginu var nokkuð vel falið um tíma. Þannig var félagið skráð til heimilis hjá foreldrum Ármanns á sínum tíma og voru þau bæði í stjórn félagsins. Ef leitað var eftir nafni Ármanns í fyrirtækjaskrá á þeim tíma var ekki hægt að sjá að hann tengdist neinum félögum.