Sá hluti braggans í Nauthólsvík sem kallaður er Náðhúsið, vegna þess að áður fyrr var þar salerni, er enn ekki tilbúinn. Um er að ræða væntanlegt fundarherbergi og er það ekki frágengið. Morgunblaðið greinir frá þessu í morgun. Gert er ráð fyrir því að hægt verði að taka húsnæðið í notkun í janúar.
Náðhúsið tilheyrir þriðja hluta braggasvæðisins sem Háskólinn í Reykjavík tekur á leigu. Er stærsti hluti húsnæðisins ætlaður fyrir frumkvöðlasetur á vegum skólans þar sem verður aðstaða fyrir sprotafyrirtæki nemenda. Áður var talið að Náðhúsið yrði fjölnota fyrirlestrasalur.
Braggamálið var mikið í fréttum í haust eftir að DV upplýsti að verkefnið hefði farið 257 milljónum fram úr áætlun. Óljóst er hvort verkefnið eigi eftir að fara enn meira fram úr áætlun þar sem framkvæmdum er enn ekki lokið.
Vigdís Hauksdóttir, borgarfulltrúi Miðflokksins, gerði sér ferð á svæðið í haust og tók myndir með símanum sínum inn um glugga Náðhússins. „Ég er þrumu lostin yfir þessu ástandi. Þetta er tæplega fokhelt, það er ekkert verið að gera þarna inni og húsið er ekki tilbúið fyrir veturinn að utan. Þetta er ekki í lagi,“ segir Vigdís. Sjá hér.
Áður hefur komið fram að Reykjavíkurborg mun ekki leggja meira fé í framkvæmdirnar. Samkvæmt þeim upplýsingum eru þessar framkvæmdir á kostnað HR.