Alþingi birti í gær upplýsingar um launagreiðslur þingmanna frá árinu 2007 – 2018  á heimasíðu sinni. Benedikt Jóhannesson, stofnandi Viðreisnar, hefur gert samantekt á launagreiðslum Alþingis til þingmanna yfir þetta tímabil. Tilgreinir hann fimm launahæstu þingmenn hvers árs fyrir sig. (Töfluna má sjá neðst í fréttinni)

Samkvæmt yfirlitinu var Steingrímur J. Sigfússon greiðslukóngur ársins 2008 og 2018. Árið 2008 þénaði hann 18.6 milljónir sem óbreyttur þingmaður VG. Sem forseti Alþingis þénaði hann 22, 6 milljónir það sem af er árinu 2018.

Logi Einarsson, formaður Samfylkingarinnar, kemur næstur, með 22 milljónir það sem af er árinu.

Þórunn Egilsdóttir, þingflokksformaður Framsóknarflokksins, er í þriðja sæti með 20 milljónir það sem af er ári.

Þá kemur Bjarkey Olsen Gunnarsdóttir, þingflokksformaður VG með 19,6 milljónir og Lilja Rafney Magnúsdóttir, þingmaður VG, með 19,3 milljónir.

Landsbyggðarþingmenn ofarlega á blaði

Þingfararkaup, fastar greiðslur vegna búsetu og greiðslur vegna aksturs, flugferða og síma er innifalið í tölunum, en ekki ráðherralaun og kostnaður vegna ráðherra.

Samkvæmt yfirlitinu eru landsbyggðarþingmenn gjarnan ofarlega á blaði, ekki síst frá Norðaustur-kjördæmi:

„Arnbjörg Sveinsdóttir, þingmaður Sjálfstæðisflokks var efst árið 2007. Steingrímur J. Sigfússon, þingmaður VG, er tvö ár greiðslukóngur, árin 2008 og 2018. Árni Johnsen, þingmaður Sjálfstæðisflokks, trónir á toppnum í þrjú ári í röð, 2009 til 2011. Þuríður Bachmann, þingmaður VG, fær mestar greiðslur árið 2012, Höskuldur Þórhallsson, þingmaður Framsóknar, er efstur árin 2013 og 2015, Einar Guðfinnsson Sjálfstæðisflokki er efstur árin 2014 og 2016 og árið 2017 fær Sigurður Ingi Jóhannsson mest í sinn hlut,“

segir Benedikt. Hann segir fróðlegt að sjá þróun hæstu greiðslna á föstu verðlagi ársins 2018, í ljósi umræðna um launahækkanir þingmanna. Hann segir einnig úrskurð kjararáðs hafa spillt andrúmslofti á vinnumarkaði.

Benedikt bendir á að greiðslurnar hafa farið hækkandi að raungildi síðan 2009, en laun þingmanna hafi verið lækkuð eftir hrun. Þau hafi enn ekki náð sama verðgildi og árin 2007 og 2008:

„Kaupmáttur þeirra hefur aukist um nálægt 25% frá lægsta gildi, en rýrnað um tæplega 10% frá árinu 2008. Rétt er að vekja athygli á því að talað er um hæsta gildi, ekki meðaltal.“

Töfluna má sjá hér að neðan