Logi Einarsson, formaður Samfylkingarinnar, er launahæsti formaður stjórnmálaflokks á Alþingi. Hann er með alls 19,1 milljón í laun árið 2018.
Eyjan notaðist við upplýsingar sem gefnar eru upp á vef Alþingis, en þar má nálgast upplýsingar um laun allra þingmanna aftur til ársins 2007.
Ráðherrahluti launa formannanna er ekki reiknaður með, aðeins laun sem Alþingi greiðir. Þá er starfskostnaður vegna aksturs og ferðalaga ekki tekinn með, aðeins föst laun.
Logi fær rúma 1,1 milljón á mánuði í þingfararkaup. Sem formaður stjórnmálaflokks sem ekki er ráðherra, fær hann alls 550 þúsund krónur á mánuði, alls 1,6 milljón á mánuði.
Við þetta bætist síðan húsnæðis- og dvalarkostnaðargreiðsla sem er 134 þúsund krónur á mánuði, auk álagsgreiðslu, 53 þúsund á mánuði.
Fastur ferðakostnaður er 30 þúsund á mánuði og fastur starfskostnaður er 40 þúsund á mánuði.
Inni í þessum tölum er ekki ferðakostnaður, en Logi fékk um 1,8 milljón fyrir innanlandsferðir og tæplega 1,2 milljónir fyrir ferðalög erlendis á árinu.
Næstur Loga er Sigmundur Davíð Gunnlaugsson, formaður Miðflokksins. Hann hefur fengið alls tæpar 17,9 milljónir á árinu 2018.
Jafnar í þriðja sætinu eru Inga Sæland, formaður Flokks fólksins, og Þorgerður Katrín Gunnarsdóttir, formaður Viðreisnar, með 17,2 milljónir á árinu.
Í fjórða sætinu er Sigurður Ingi Jóhannsson, formaður Framsóknarflokksins með 12,7 milljónir.
Í fimmta sæti er Björn Leví Gunnarsson með 11,6 milljónir en Píratar þiggja ekki álag sem formenn flokka fá greitt frá Alþingi.
Í sjötta sæti eru Bjarni Benediktsson, formaður Sjálfstæðisflokksins og Katrín Jakobsdóttir, formaður VG, jöfn með 11,4 milljónir.
Sigurður Ingi, Bjarni og Katrín fá einnig greidd laun frá ríkinu vegna ráðherrastöðu þeirra, sem ekki eru reiknuð með í þessari tölu.
Sjá einnig: Steingrímur J. Sigfússon er greiðslukóngur ársins – Sjáðu launahæstu þingmennina frá 2007 – 2018
