Fréttaskýringaþátturinn Kveikur fjallaði um rafbílavæðingu í gærkvöldi. Hún gengur í raun furðu hægt fyrir sig á Íslandi – ef miðað er til dæmis við Noreg. Í þættinum sagði að við á Íslandi værum ekki tilbúin fyrir rafbílavæðingu.
Undir hinu nýbyggða Hafnartorgi í Reykjavík verða 1160 bílastæði. Ætli það sé ekki örugglega stærsta bílastæðahús landsins? Það verður opnað um áramótin. Menn greinir reyndar á um hversu góð hugmynd það er frá skipulags- og umhverfissjónarmiði, en það er semsagt gert ráð fyrir að fólk komi á bílum til að versla á Hafnartorgi – rétt eins og um Kringluna eða Smáralind væri að ræða.
En svo eru líka stæði fyrir íbúana í húsunum. Þau verða leigð út – sagt er að þau dýrustu muni kosta um 70 þúsund krónur á mánuði.
Annað vekur athygli. Í frétt sem birtist í Morgunblaðinu um daginn og fjallaði um þessi miklu mannvirki segir beinlínis að ekki sé gert ráð fyrir því að hægt sé að hlaða rafmagnsbíla í þessum gríðarlegu bílakjöllurum.
„Það fylgir öll þjónusta með þessum stæðum en það er ekki gert ráð fyrir rafhleðslu eða neinu slíku,“ segir rekstrarstjóri hússins í fréttinni.
Nú spyr maður – gleymdu menn því að ætlun stjórnvalda er að rafbílar verði regla fremur en undantekning innan fárra ára, er umhverfisvitundin svona slöpp eða var bara verið að spara?