Jón Baldvin Hannibalsson segir í Silfrinu að Íslendingum sé í lófa lagið að hafna því að vera með í orkupakka Evrópusambandsins án þess að það þýði slit samningsins eða hafi einhverjar slíkar afleiðingar. Hann segir að íslenskum ráðamönnum sé í lófa lagið að tilkynna Evrópusambandinu þetta.

Öllum fremur telst Jón Baldvin vera höfundur þessa samnings hvað Ísland varðar og helsti talsmaður hans. Hann segir að EES samningurinn sé „völundarsmíð“ sem henti Íslendingum vel, en hann segir að í núverandi ástandi eigi Ísland ekkert erindi inn í ESB.

Viðbrögð Evrópusambandsins við kreppunni sem hófst 2008 valdi því. Þar hafi Evrópusambandið tekið afstöðu með bönkum í Þýskalandi og Frakklandi gegn hagsmunum almennra borgara. Evran hafi verið dragbítur – gjaldmiðillinn sé illa hannaður og nýtist einkum „Stór-Þýskalandi“. Í Evrópu hafi efnahagsbatinn eftir hrunið verið mjög hægur – það sé eins og nafn hagfræðingsins Keynes hafi gleymst.

Í þættinum var einnig rætt um Brexit. Jón Baldvin telur að ein afleiðing útgöngunnar gæti verið sú að Skotland gæfist upp á sambandinu við Bretland og yrði sjálfstætt ríki sem væri aðili að Evrópusambandinu og jafnvel Norðurlandaráði.

Þáttinn má sjá með því að smella hérna.