Samkvæmt lögum verða stjórnarmenn í Fjármálaeftirlitinu að hafa óflekkað mannorð. Það þýðir að þeir megi ekki hafa gerst sekir um alvarlegt lögbrot. Líkt og greint hefur verið frá, er lagt til að sú krafa verði felld niður í nýju í stjórnarfrumvarpi um breytingu á ýmsum lögum vegna afnáms ákvæða um uppreist æru, sem lagt er fram af dómsmálaráðherra, Sigríði Á. Andersen.

Verði frumvarpið samþykkt á Alþingi, munu þeir sem gerst hafa sekir um alvarleg lögbrot því að fá að sitja í stjórn FME, tíu árum eftir dóm sinn.

Enginn rökstuðningur fylgdi þessari tillögu í greinargerð frumvarpsins og í umsögn Alþýðusambands Íslands er þetta gagnrýnt, þar sem tillagan er sögð draga „verulega“ úr hæfisskilyrðum.

Frá fjármálaráðuneytinu komið

Samkvæmt svari dómsmálaráðuneytisins við fyrirspurn Kjarnans, kemur í ljós að tillagan um að fella niður kröfuna um óflakkað mannorð, kemur ekki frá Sigríði Á. Andersen, heldur frá starfshópi fjármálaráðuneytis Bjarna Benediktssonar, sem skilaði skýrslu þann 13. júní um lagaumgjörð Fjármálaeftirlitsins.

Í starfshópnum sátu Har­aldur Stein­þórs­son, Eva H. Bald­urs­dótt­ir og Leifur Arn­kell Skarp­héð­ins­son, lög­fræð­ingar í fjár­mála- og efna­hags­ráðu­neyti, Tinna Finn­boga­dótt­ir, hag­fræð­ingur í fjármála- og efnahagsráðuneyti og Jóhannes Karl Sveins­son hrl., lög­mað­ur, sem var for­maður starfs­hóps­ins.

Tilkynnt hefur verið um sameiningu FME og Seðlabanka Íslands. Í því ferli felst endurskoðun á lögum stofnananna beggja, en tilgangurinn er að styrkja eftirlit með fjármálamarkaði.