Hinn kunni leikari og rithöfundur, Felix Bergsson, stígur í dag fram, þeim hjúkrunarfræðingum til varnar sem gert hafa athugasemdir við barnabók Birgittu Haukdal. Felix bendir á að hlutfall karlkyns hjúkrunarfræðinga hér á landi sé afar lágt. Telur hann að rótgrónir fordómar geti átt þar hlut að máli.

Forsaga málsins er sú að hjúkrunarfræðingurinn Sólveig Auðar Hauksdóttir gagnrýndi gamlar staðalímyndir í barnabók söngkonunnar Birgittu Haukdal, Lára fer til læknis, þar sem hjúkrunarfræðingur er kallaður hjúkrunarkona og settur í lítilfjörlegt aðstoðarhlutverk á meðan karlkyns læknir er í aðalhlutverki umönnunarinnar. Enn fremur er hjúkrunarfræðingurinn klæddur í kjól og með kappa á höfði á mynd.

Pistill Sólveigar vakti miklar umræður sem hafa víða orðið nokkuð hatrammar. Hafa netverjar bæði gagnrýnt Birgittu harðlega sem og Sólveigu og aðra hjúkrunarfræðinga og skoðanasystkini hennar. Í viðtali á Bylgjunni, sem greint frá frá Vísi, segist Birgitta ekki eiga skilið þær árásir sem hún hafi orðið fyrir vegna málsins. Birgitta segir: „Mér þykir það ótrúlega leitt ef ég hef sært einhvern með því að nota þetta orð „hjúkrunarkona.“ Ég vissi ekki betur en að það væri í orðabókinni en núna veit ég betur, þannig ég vil koma því á framfæri að rétt skal vera rétt.“

Karlkyns hjúkrunarfræðingar á Íslandi mjög fáir

Samkvæmt grein eftir Ingólf Gíslason, dósent í félagsfræði, er hlutfall karlmanna sem hjúkrunarfræðinga á Íslandi aðeins 2%. Hlutfallið sé mun hærra í ýmsum löndum sem við berum okkur saman við, til dæmis 10% í Svíþjóð. Karlskyns hjúkrunarfræðingar á Íslandi mæti ýmiskonar fordómum:

„Stundum eru þeir „grunaðir“ um að vera hommar, stundum fá þeir að heyra að þeir hafi farið í þetta til að geta verið eini haninn á haugnum, eini karlinn í stórum hópi kvenna.“

Guðbjörg Pálsdóttir, formaður Félags Félags íslenskra hjúkrunarfræðinga, sá tilefni til að skrifa grein á vef félagsins fyrr á árinu þar sem hún hvatti til fjölgunar karlmanna í greininni. Vill formaðurinn grípa til sértækra ráðstafana til að fjölga karlkyns hjúkrunarfræðingum.

Felix: Umræðan andstyggileg

Varðandi umræðurnar um barnabók Birgittu þá telur Felix Bergsson að hjúkrunarfræðingarnir sem lögðu orð í belg hafi verið með hófsamar athugasemdir en viðbrögðin við þeim hafi verið úr takti. Pistill hans á Facebook um málið er svohljóðandi:

„Það er leitt hvað við eigum erfitt með að ræða málin á yfirvegaðan máta á Íslandi. Allt verður svo persónulegt og rætið um leið. Mér finnst stórmál hversu fáir karlmenn fást til að leggja stund á hjúkrunarfræði á Íslandi og einhvern veginn þarf að koma þeirri umræðu upp úr hjólförum. Hvernig gengur HÍ að lagfæra hlutina hjá sér? Eru kennararnir þar hættir að ávarpa alla nemendur í hjúkrun í kvenkyni? Erlendis hittir maður oftar en ekki karlkyns hjúkrunarfræðinga en heima nánast aldrei. Kannanir benda til að þeir sem fara í hjúkrunarfræði séu álitnir minni menn og þurfi að þola háðsglósur frá vinum og ættingjum. Þeir gefast margir upp í miðju námi. Að mínu mati bendir það til fordóma sem erfitt er að vinna bug á. Ég held líka að hjúkrunarfræðingar séu að reyna að benda á þessa fordóma með umræðunni sem þau hófu. Viðbrögðin hafa því miður verið fyrirsjáanleg og andstyggileg.“