Styrmir Gunnarsson, fyrrum ritstjóri Morgunblaðsins, segir að höfnun Framsóknarflokksins um helgina á innleiðingu þriðja orkupakka ESB, séu pólitísk stórtíðindi og feli í sér að alvarlegur ágreiningur sé komin upp innan stjórnarflokkana um málið:
„Innan þingflokks Sjálfstæðisflokksins er hörð andstaða við málið en þar er líka að finna ákafa talsmenn þess að samþykkja. Staðan innan VG er óljósari og misvísandi fréttir, sem þaðan berast. Uppreisn gegn samþykkt orkupakkans er að breiðast út innan Sjálfstæðisflokksins, þegar svo er komið að Sjálfstæðisfélag Skóga- og Seljahverfis, hefur boðið Jóni Baldvin Hannibalssyni, fyrrum utanríkisráðherra og formanni Alþýðuflokks á fund til þess að ræða málið, en Jón Baldvin hefur snúizt hart gegn orkupakkanum,“
segir Styrmir
Hann fullyrðir að samstarfi ríkisstjórnarinnar sé lokið, ef hún reyni að knýja samþykkt málsins fram á Alþingi, með stuðningi Samfylkingar og Viðreisnar. Hann segir einnig að Sjálfstæðisflokkurinn og Vinstri grænir verði að gera hreint fyrir sínum dyrum:
„Með samþykkt miðstjórnarfundarins hefur Framsóknarflokkurinn náð frumkvæði í andstöðunni við orkupakkann í sínar hendur og þar með ýtt Miðflokknum til hliðar sem var á góðri leið með að ná pólitískri forystu í málinu til sín. Nú hefur Framsókn gert hreint fyrir sínum dyrum.Sjálfstæðisflokkur og VG verða að gera það sama.“
Sigurður Ingi Jóhannsson, formaður Framsóknarflokksins, sagði um helgina að hann vildi geta innleitt samninginn með ákveðnum undanþágum með fyrirvara um framhaldið. Þeir sem eru mótfallnir innleiðingu orkupakkans vísa gjarnan í að slíkt fæli í sér framsal á fullveldi Íslands til Evrópusambandsins, þar sem ACER stofnunin gæti tekið ákvarðanir um orkuverð á Íslandi ef landið skyldi tengjast Evrópu með sæstreng.