Þingmenn takast nú á í fjölmiðlum um hvort tillögur fjárlaganefndar til fjárlaga næsta árs feli í sér niðurskurð til öryrkja eða ekki. Orðalagið virðist vera helsti ásteytingarsteininn, því stjórnarandstæðingar tala um fáheyrðan niðurskurð milli fyrstu og annarrar umræðu, meðan stjórnarliðar tala um minni hækkun en gert hafi verið ráð fyrir á tímabilinu. Málið sé í raun einn stór misskilningur.
Þuríður Harpa Sigurðardóttir, formaður Öryrkjabandalagsins, sagðist vera undrandi á þessum tillögum fjárlaganefndar, þessi hópur hefði ekki fengið neinar leiðréttingar, öfugt við aðra hópa í landinu. Þá sagði Ágúst Ólafur Ágústsson, fulltrúi Samfylkingar í fjárlaganefnd, að tillögurnar séu óskiljanlegar á „hátindi hagsveiflunar.“ Logi Einarsson, formaður Samfylkingarinnar, sagði það fáheyrt að ríkisstjórn lækki boðuð framlög til viðkvæmra hópa, milli fyrstu og annarrar umræðu fjárlaga. Helga Vala Helgadóttir, þingmaður Samfylkingar, segir að „einbeittan brotavilja“ þurfi til að lækka framlag til öryrkja um rúmlega milljarð og útskýra það með forsendubresti.
Bjarni Benediktsson, fjármálaráðherra, sagði við RÚV að í raun væri það töf á kerfisbreytingum sem orsakaði þennan misskilning, því í raun væri verið að auka framlögin, ekki skera þau niður:
„Það er mikill munur á því að fara í niðurskurð á almannatryggingum sem standa undir greiðslum til öryrkja, eða því sem við erum að gera sem er að bæta í. Við erum með fjóra milljarða sem við höfum tekið frá á ári til þess að ráðast í breytingar til hagsbóta fyrir öryrkja. Það er vinna sem hefur staðið yfir í nokkur ár og stendur enn yfir. Vegna þess hve langt er liðið á árið erum við ekki að gera ráð fyrir því að breytingarnar geti tekið gildi frá og með áramótum og það hefur þá þær afleiðingar að sú fjármögnun sem fylgir kemst ekki út til öryrkja frá og með áramótum en við erum að gera ráð fyrir að það geti orðið, samkvæmt þessum tillögum, á fyrsta ársfjórðungi. Í heildina þýðir þetta það að í fjárlagafrumvarpinu var gert ráð fyrir að við myndum bæta til öryrkja á næsta ári sex milljörðum en vegna þeirra tafa sem eru að verða á kerfisbreytingum þá eru það 5 milljarðar sem bætast við. Þannig að allt tal um niðurskurð er á algjörum misskilningi byggt.“
Jæja-hópurinn hefur efnt til mótmæla á pöllum Alþingis á morgun klukkan 17 undir yfirskriftinni „Stöðvum niðurskurðinn – Mætum á pallana“.
Þar segir einnig:
„Ríkisstjórnin leggur til að skera niður framlög til öryrkja um rúman milljarð í stað þess að hækka skatta á hina ríku. Mætum á pallana og sýnum þinginu að við séum að fylgjast með og sættum okkur ekki við niðurskurð til öryrkja á meðan enn stendur til að lækka veiðigjöld um 3. milljarðar. Höfnum sveltistefnu nýfrjálshyggjunnar og krefjumst fjármögnunar velferðarkerfisins og heilbrigðiskerfisins. Ríkisstjórnir eiga ekki að skera niður þegar hægir á hagkerfinu heldur að auka útgjöld! Fólk framar auðvaldi! Stöðvum sveltistefnuna!“
Þegar þetta er skrifað hafa alls níu manns boðað komu sína og aðrir 40 segjast áhugasamir. Meðal þeirra sem boða komu sína er Halldóra Mogensen, þingmaður Pírata.
