Víglundur Þorsteinsson, fyrrverandi forstjóri BM Vallár, er látinn 75 ára að aldri. Hann lést á líknardeild Landspítalans í fyrrinótt. Víglundur var fæddur 19. september árið 1943. Hann var áratugum saman umsvifamikill í íslensku atvinnulífi og var lengi vel í forystu ýmissa samtaka atvinnurekenda. Hann var meðal annars formaður Félags íslenskra iðnrekenda á árunum 1982 til 1991. Einnig sat hann í stjórn Lífeyrissjóðs verslunarmanna í rúm 20 ár, eða frá árinu 1986 til 2007. Víglundur sat í stjórn Eimskips frá árinu 2013 til dánardags.
Víglundur var framkvæmdastjóri fulltrúaráðs Sjálfstæðisflokksins á árunum 1970 til 1971 og bæjarfulltrúi sama flokks á Seltjarnarnesi á árunum 1974 til 1978.
Eftirlifandi eiginkona Víglundar er Kristín María Thorarensen, skrifstofumaður. Fyrri kona hans er Sigurveig Ingibjörg Jónsdóttir fréttamaður. Synir Víglundar og Sigurveigar eru Jón Þór, Þorsteinn og Björn. Börn Kristínar, stjúpbörn Víglundar, eru Axel Örn Ársælsson og Ásdís María Thorarensen.