Meðal Íslendingurinn mengar mest allra Evrópubúa. Árið 2016 var Ísland með mesta losun koltvísýrings á einstakling af öllum ríkjum innan ESB og EFTA svæðisins. Ísland var í þriðja til fjórða sæti árið 2008 en losun hefur aukist vegna aukins flugreksturs og skipaflutninga frá árinu 2012.
Fram kemur á vef Hagstofunnar að önnur lönd sem hafa verið með háa losun koltvísýrings á einstakling eru Lúxemborg, Danmörk og Eistland og hefur losun hjá þessum löndum verið á bilinu 13 til 19 tonn af koltvísýringi á einstakling. Almennt hefur losun á einstakling lækkað innan ESB og eru flest lönd komin niður í um 9 tonn á einstakling, en hjá einstaka löndum er gildið lægra.
Þróun í losun frá hagkerfi Íslands á einstakling hefur verið á skjön við hin Norðurlöndin. Danir hafa náð mestum árangri í að draga úr losun, en losun á einstakling náði hámarki árið 2006. Svíþjóð hefur sýnt afgerandi lægsta losun frá sínu hagkerfi.
