RÚV greindi frá því í gær að í fyrsta jarðvinnuáfanga Nýs Landsspítala verði 339 þúsund rúmmetrum af jarðefni ekið á brott, í 22,600 vörubílaferðum, eða um 49 ferðir á dag. Þær tölur eru fengnar frá skrifstofustjóra framkvæmda- og viðhaldssviðs Reykjavíkurborgar, eftir fyrirspurn Baldurs Borgþórssonar, varaborgarfulltrúa Miðflokksins.
Vilhjálmur Ari Arason, læknir á Landspítalanum og Eyjubloggari, segir á Facebook að tvöfalda þurfi þessar tölur í frétt RÚV, því vörubílaferðirnar verði í raun alls 45.200:
„Hver flutningur kallar hins vegar á TVÆR ferðir, ekki eina. Fram og til baka. Ferðirnar gegnum miðbæinn verða því auðvitað 45.200 sem gera 2.510 ferðir í mánuði, 584 ferðir á viku og 98 ferðir á dag í 20 mánuði gegnum miðborgarumferðina frá kl 9-16, sex daga vikunnar.
Vilhjálmur segir frétt RÚV vera falsfrétt og setur jarðvegsflutningana í samhengi við svifryksmengun í Reykjavík, sem hefur verið með hæsta móti undanfarin ár. Vilhjálmur hefur ekki mikla trú á þeim aðgerðum sem koma eiga í veg fyrir svifryksmengun af völdum jarðvegsflutningana, líkt og borgin hefur talað um sem „umtalsvert meiri“ en þekkst hefur til þessa hér á landi:
„Algjörlega óþarfi að fegra dæmið og slá ryki í augu borgarbúa með þessum falsfréttum RÚV sem og stórkostlegu mikilvægi dekkjaþvottar fyrir heildarmyndina og sem lýst er sem stórkostlegu menningarafreki. Verkfræðilegri snilld!! Síðan er allur aðflutningur byggingarefnis auðvitað eftir næstu 4 árin til 2025-2026 og það aðeins verið að miða við 1. áfanga af þremur!!!!“Voru einhverjir hjá Reykjavíkurborg síðan að hafa áhyggjur af svifryksmengun í miðborginni góðu næsta áratuginn og heyra má reglulega í fréttum og tilmælum til borgarbúa nú að nota t.d. ekki nagladekk í vetur og helst ekki einkabílinn yfir höfuð til vinnu. Vegna þegar sprungna vegasamgangna gegnum höfuðborgina.“