Heiðveig María Einarsdóttir var rekin úr Sjómannafélagi Íslands vegna þess að forystumenn félagsins töldu að hún gengi erinda sósíalista og að formannsframboð hennar væri liður í yfirtöku sósíalista á verkalýðsforystunni. Þetta kemur fram í skjali sem Eyjan hefur undir höndum, skjalið fylgdi tillögu þeirra Arngríms Jonssonar, Jóns Bragasonar, Steinþórs Hreinssonar og Steinar Haralds um brottrekstur Heiðveigar Maríu úr félaginu.
Sjá einnig: Heiðveig var rekin í dag og er gáttuð
Hér má lesa viðtal DV við Heiðveigu
Líkt og greint hefur verið frá ætlaði Heiðveig María að bjóða sig fram til formanns SÍ á aðalfundi félagsins í desember. Hún hefur gagnrýnt stjórnina harðlega, síðar kom í ljós að hún væri ekki kjörgeng vegna þess að hún hefur ekki greitt félagsgjöld í þrjú ár en telur hún það ekki gilt. Jónas Garðarsson, formaður Sjómannafélags Íslands, sagði í gær að það hafi verið fátt annað í stöðunni en að reka Heiðveigu Maríu Einarsdóttur, frambjóðanda til formennsku, úr félaginu.
Sjá einnig: Jónas segist ekki hræddur við Heiðveigu
Skjalið er myndskreytt af skjáskotum af fréttum um deilurnar í kringum framboð Heiðveigar, er því haldið fram að framboð hennar sé liður í yfirtöku sósíalista á Íslandi, undir forystu Gunnars Smára Egilssonar, á verkalýðshreyfingunni. „Haustið 2017 bárust símtöl til skrifstofu Sjómannafélagsins frá Gunnari Smári Egilssyni um tímasetningu stjórnarkjörs í Sjómannafélaginu.“ Er svo rakin uppgangur Sólveigar Önnu Jónsdóttur í Eflingu, hún hafi þá talað um að SÍ væri næst.
Heiðveig María nýtur mikils stuðnings meðal sjómanna sem Eyjan hefur rætt við. Nýtur hún mikils stuðnings á samfélagsmiðlum. Í skjáskotun innan úr Fésbókarhópi sem telur hundruð sjómanna er talað um að safna undirskriftum til að krefjast félagsfundar hjá Sjómannafélagi Íslands.
Heiðveig María, sem er viðskiptalögfræðingur, fór í framboð fyrir Sjálfstæðisflokkinn árið 2006. Skipaði hún 8. sæti á lista flokksins í sveitarstjórnarkosningum.
