Þessa fallegu, nánast draumkenndu ljósmynd, setti Hlín Íris Arþórsdóttir inn á vefinn stórkostlega Gamlar ljósmyndir og sagði að hún væri úr fórum móður sinnar. Myndin er sérstök að því leyti að hún er augljóslega lituð eftir á – það sem helst hefur verið bætt inn grænum lit í himininn og á bíl sem er fremst á myndinni, gulum lit á Hreyfilssjoppuna og skærum ljósum í glugga verslana, á klukkuna á Lækjartorgi og strætisvagninn sem ekur af torginu – í vinstri umferð. Mörg húsanna sem þarna sjást eru horfin.
Myndin er tekin neðst á Arnarhóli – þetta er svæðið þar sem Hafnartorgið svonefnt er nú að rísa. Það er horft í átt að Lækjartorgi. Þar gnæfir stórhýsi á þeirra tíma mælikvarða, þar voru skrifstofu en líka eins konar fordyri að Nýja bíói. Ljósin loga skært í gluggunum á fataverslun Haraldar Árnasonar – það þótti ein flottasta búð á landinu og þótti alþjóðlegur bragur yfir henni. Hún tók til starfa í Aðalstræti 22 árið 1915 en lagði upp laupana 1960.
En fremst á myyndinni er semsagt bifreiðastöð Hreyfils, Hreyfilssjoppan. Um tíma rak hana sá mikli merkismaður, Pétur Pétursson þulur. Fyrir fáum dögum, 16. október, voru liðin 100 ár frá fæðingu Péturs.
Bifreiðaflotinn fyrir utan er allur amerískur – að þeirra tíma hætti. Glöggur maður sem rýndi í myndina taldi að yngsti bíllinn á myndinni væri árgerð 1954. Myndin er sem sagt tekin eftir það, en varla miklu síðar.
